in , ,

Mata San Nikolas

Ai Dios e póber. At’é drumí ei. Nèchi den su kaha di oro, rondoná di rosa, e abominashon ku nos ta yama “zwarte piet” i algun mucha ku a logra bai Spaña pa e entiero. Lágrimanan ta lora nèchi den rei asina ei for di wowo dje pober muchanan. San Nikolas nasé na Gresia na aña 270 a fayesé na aña 343. Un bon hòmber, un obispu respetá. Lástimamente nos a yuda e hulandesnan pa hopi aña daña su patrimonio, selebrando su aña ku un payaso ku barba largu ku ta hunga p’é, rondoná di un sèt di ayudante – lesa katibu – ku kara di fèrf pretu. Ta basta k’e pantomina ‘ki. Mata San Nikolas pa kaba. Pas’é na televishon pa tur hende mira: San Nikolas a fayesé despues di un lucha brevio kontra Corona. “Dag Sinterklaasje”.

Si nos mata San Nikolas e aña aki, e hòmber santu lo a biba un bida largu di 1750 aña, danki na nos tradishon. Esei riba su mes ta un honor, naturalmente sin konta e deshonor k’e elementonan perverso di nos tradishon ta tira na e mesun hòmber santu su kara. Ku morto di San Nikolas, e ayudantenan ku pa hopi aña a lucha, lora miles di regalonan, lesa kartanan dje muchanan, i riba 5 di desèmber anochi i mardugá kana rònt Kòrsou parti regalo, finalmente lo wòrdu liberá. Liber pa hasi loke nan ke i ki ora ku nan ke, sin aprobashon dje hòmber blanku. E lastu katibunan, liberá.

Katibu nan ta

E promé biaha ku nos sa di e introdukshon di zwarte piet ta na aña 1850, 13 aña promé k’e kadena di sklabitut a wòrdu kibrá, 55 aña despues di morto di don Tula i 170 aña promé ku e artíkulo aki. Jan Schenkman, un dosente hulandes, a skibi e buki “Sint Nikolaas en zijn knecht”. Den e buki aki por mira e promé pinturanan di zwarte piet, un homber koló skur bistí mas o ménos na pidjama i di desendensia arabé. Tene na kuenta ku den e tempu ei tabatin hopi katibu di kas arabé ta traha pa diferente hende di klase sosial haltu den Oropa. Promé ku e buki aki, San Nikolas tabata un hòmber mahos, desagradabel i estrikto. E buki su intenshon tabata pa halsa e nòmber i klase di San Nikolas. E uniko manera pa hasi esei tabata pa ilustr’é manera otronan bibá na Oropa di klase haltu: huntu ku un katibu.

Naturalmente e katibu tabata koló skur; echo ta ku hulandesnan tabata mira tur hende ku tabata mas skur ku nan mes komo inferior i sin derechi di bida. Atrabes di añanan zwarte piet a wòrdu poné na kadena, manera tabata hasi ku katibunan: na garganta, pòls of ènkel. Djis buska “zwarte piet geketend” riba Google pa bo wak e potrètnan ku bo mes wowo. San Nikolas ta fotografiá diferente biaha teniendo e kadena ku ta sera na garganta di su supuesto ayudante. AI, KI HÒMBER TAN SANTU! Banda di esei zwarte piet a bin haña u aksènt sürnameo ku el a laga lòs despues ku sürnameonan a protestá rigorosamente pa hopi aña. Un kos ta sigur, zwarte piet semper tabata koló skur, semper su lep tabata diki di rushi kòrá i semper e tabatin un afro. E intenshon semper tabata pa zwarte piet ta un hende pretu, un katibu, den e kaso aki di San Nikolas.

Danki, pero nò, e no ta bon asina

Yama danki nan di. Hulandesnan a kambia e tradishon hopi. Zwarte piet a pèrdè su aksènt sürnameo, e no ta bisti renchi grandi di oro mas anto e no ta koló skur. Su kara a bira pretu dor di e chimené den e míles di chimeneanan ku e ta drenta tur aña. Ta un hòmber blanku e ta! 
 Karamba, e hòmber blanku su kabei ta kambia bira afro tambe?

Karamba, e hòmber blanku su lep ta bira diki tambe? Òf ta botòks zwarte piet ta huza?

Karamba, ta den refeneria isla tur nos muchanan ta biba ? Pasó ta unda otro tin tantu chimené? Ma k*ñ#, zwarte piet, no sa baña ni laba kara?

Hopi bon purbá pero nò, e no ta bon asina. Nos yunan no ta bai kere den e pantomina aki. Ora nan realisá ku San Nikolas no por ta eksistí, nan tambe lo puntra nan mes dikon karaho zwarte piet ta manera e ta. Un katibu pretu ku kisas parse nan mes òf un hende ku nan konosé.

Dia di mucha

Pero kon awor? Sin San Nikolas un bashí ta wòrdu kreá den novèmber. Awèl si tin bashí, yen’é! Dia di mucha, Nikolas San, yamele kon ku bo ke pero mester tin un kos ku nos por inventá pa duna nos muchanan regalo tóg? Latinoamerika ta selebrá “dia de los niños” tur aña. Laga nos krea nos mes kos. Nos mes tradishon sin katibu skondí. NOS dia di mucha. Manda bo karta òf e- mail na ministério di kultura. Nan no tin hopi kos di hasi. 
 

E bon yu di Kòrsou, Z. 

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Arte di rèp: Lil Homie