in

Tras di Porta Sera

Con mi experencia cu violencia domestico y uzo di droga den cas a cambia mi bida pa semper

Algo cu ta hopi comun pero kisas no papia masha di dj’e ta uzo di droga y violencia domestico y emocional den cas. Desde mucha nos ta mira nos mayornan como nos heroe cu lo haci tur lo posibel pa proteha nos. Lamentablemente esaki ta un realidad diferente pa hopi mucha, y adulto manera mi mes. Loke ta importante pa sa y corda ta cu apesar cu tempo ta pasa, e no ta algo cu bo simplemente ta lubida. Pa hopi persona mira un mayor abusa di droga, alcohol of cualkier substancia ta inicia un ciclo vicioso. Despues di 18 aña cu mi a experencia tur esaki y cu mi a corta comunicacion cu mi tata, ainda e ta afecta mi salud mental.

Pa hopi famia, e ciclo di cualkier forma di violencia y uzo di substancia of adiccion ta algo cu ta pasa pa diferente generacion sigi. Violencia y adiccion ta comportacion cu bo ta siña y adapta na dj’e como forma pa por anda cu bo problemanan. Den caribe violencia domestico y uzo di substancia incluso adiccion di sea droga of alcohol no ta un secreto. Pa aña na Aruba un estimante 500 caso ta ser registra di violencia cual no ta inclui e miles di casonan cu nunca ta raporta pa miedo, berguensa of falta di informacion.

E Marka Invisibel di Violencia Domestico y Adiccion
E impacto di trauma infantil ariba e persona adulto ta varia pa cada persona y si esaki no ta ricibi e atention y ayudo necesario, consequencianan ta inclui problema mental, emocional, dificultad cu pareha den relacion y adiccion y entre otro loke ta conoci como post-traumatic stress disorder (PTSD). Adiccion y uzo di substancia mayoria biaha tin un relacion cu violencia domestico y segun statistica 80% di caso di violencia domestico rond di mundo ta involvi uzo di susbtancia. Violencia domestico no necesariamente ta abuso fisico, si no tambe emocional, of psicologico manera insulto, menasa, gritamento y abuso verbal.

Muchanan cu ta experencia esaki na un edad hopi jong ta core e riesgo di mas grandi. No solamente paso muchanan ta mas vulnerabel y incapas pa sali di e situacion directamente, pero tambe paso e ta e periodo cu nan celebro ta forma. Baby y muchanan chikito cu ta testigo di violencia na cas ta experencia hopi stress emocional cu ta afecta nan desaroyo y ta haci nan daño cognitivamente. Algun forma con esaki ta bira visibel den nan comportacion cual por continua t’e na grandi si no haya e tratamento necesario ta inclui: iritabilidad, problema cu drumimento, stress emocional, inabilidad pa keda su so of concentra y problema nan psikiatrico of mental.

Awe cu 25 aña di edad y como un profesional den area di salud mental, ainda mi ta purba acepta cu esaki ta un realidad cu mi mester biba cune pa resto di bida. Pero no ta tur cos ta scur paso tin un banda positivo cu semper bo por saca di cualkier situacion. Despues di a busca diferente ayudo psicologico mi a bin na realisa cu mi experencia cu violencia domestico na cas ta loke a forma ken mi ta. Na un cierto punto den bo bida, bo ta yega na e realisacion cu bo tin e poder pa cambia e patronchi di e generacion nan di bo famia cu ta bin y kibra e ciclo vicioso aki. Kisas esaki ta e motibo dicon mi a scohe e bunita profession pa ta un trahador social. Semper mi tawata tin e deseo pa cambia e mundo y yuda cualkier persona cu mi haya mi delanti, pero loke mi a realisa ta cu pa haci esaki mi mester a yuda mi mes y bira mi propio heroe. Tempo so no por cura heridadnan cu a impacta bo niñez, e ta importante pa bo busca e ayudo necesario pa asina traha y surpasa e bareranan aki. Mayoria biaha ta e mesun experencianan similar nos ta sigi encontra por ehempel den e tiponan di pareha cu nos ta scohe, of e forma con nos ta papia y anda cu otro. E posibilidad semper ta existi pa cambia y pa cura heridanan cu no semper tawata visibel. Busca informacion online y haci un cita cu un profesional serca di bo.

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Keda korda Tula

Arte di rèp: Lil Homie