in , ,

A yega e momentu pa nan siña papiamentu

Fuente: Papia di Kaya

Doe je best’, asina gobièrnu di Kòrsou a kontestá e siudadano hulandes oropeo. Ai Dios e pober. E hòmber simplemente a laga sa ku gobièrnu no a tradusí algun página ku informashon tokante medidanan ku gobièrnu a tuma. Awèl ta ku hopi pasenshi e ambtenar – lástimamente nos no sa su nòmber, pero e persona aki meresé dos te tres premio – a duna kontesta. Di un manera sivilisá a bisa e hòmber: ‘ shon, no tin purá. Nos ta duna informashon na papiamentu promé, pasó ta esei nos ta papia akinan. Hulandes, spañó i ingles ta bini despues. Lo ta un bon momentu pa bo bai siña papiamentu. Hasi bo bèst!’

Tur esaki i hopi mas a okurí riba e famoso Facebook, pasó Facebook a bira un dje maneranan indespensabel pa komuniká ku komunidat. E ta fásil, lihé i ta duna espásio pa debatenan kòrtiku i bulgar entretené nos dushi hendenan. Ta poko hende a rabia k’e mener aki? Anto mener a keda komentá! Bisa nos ku hulandes ta un idioma ofisial na Kòrsou i ku Kòrsou ta multikultural. Arogantemente bisando nos ku ta nos deber di tradusí tur karaho ku nos gobièrnu ta bisa. Awèl, einan bo ta robes mi amigu. Ni de bola!

Ta bo so ta pidi

Kòrsou tin tres idioma ofisial: papiamentu, hulandes i ingles, pero hopi di nos lo konsiderá spañó tambe komo un di nos lenganan ofisial. No obstante, laga nos wak e kos téknikamente: nos ordenansa di pais. Artíkulo kuater ta bisa ku ora ta trata di komunikashon en general, gobièrnu lo komuniká den maske ta un dje idiomanan ofisial. Pero nos ta lif, nos ta hopi lif. Pasobra nos gobièrnu ta hasi kasi tur komunikashon den kuater idioma. Awor mi shon, si e komunikado na hulandes a dura un tiki, ta en bèrdat un bon momentu pa bo kuminsá na siña un par di palabra, engrandesé bo portofolio linguístiko ku nos dushi papiamentu. Bibando na Kòrsou, ta un i tur su deber pa siña, papia i dominá papiamentu. Nos por tin tres lenga ofisial, pero nos tin un lenga natal. Pa-pia-men-tu.

Awor ta siegu nos tur a bira? Niun hende no ta ripará ku ta nan so ta pidi. Ta kon bini ta e hulandes oropeo so ta pidi informashon na e idioma ku e ta papia den su kas. E hindúnan, hamaikinonan, kanadesnan, haitianonan i tur sobrá so por integrá? Hamas bo ta tende un hindú pidi hende papia ingles. E personanan aki tambe (den hopi kaso) ta papia nan propio idioma na nan kas, pero ora gobièrnu lansa un komunikado na papiamentu, nan por les’é i komprond’é. Esei ta un isla multikultural. Ki’ falta bo so?!

E bèrdat

E problema ku nos tin ta bai muchu mas ayá di hendenan ku ta ninga di siña papiamentu. Nos yu’i Kòrsounan a laga un grupo di hende apartá nan mes kompletamente. E kos ta asina leu ku nos por konkluí ku Kòrsou tin dos ekonomia. Hulandesnan oropeo por sali nan kas, pasa supermerkado, pasa kápsalòn, buska nan yu for di skol, bai laman, bai un bar, pasa trùk’i pan sin papia un palabra na papiamentu, i mas tristu ainda, sin interaktuá ku un hende ku no ta hulandes oropeo. Hulanda den Kòrsou. E kos aki ta devastador! E plaka ku ta den man di hulandesnan oropeo riba nos isla ta keda den man blanku so. E plaka ta pasa di man blanku pa man blanku, pa drenta un otro man blanku, sin nunka kai den lachi di gobièrnu pasó nos tur sa ta ken no sa paga impuesto riba nos isla. Palabra di bèrdat ese

En fin, dos ekonomia riba un isla, divishon, diskushon tokante di kua lenga ta papia riba MI isla… Ta pòrnada Tula ta drumí den su graf sin su kabes? Nos mes a laga e kos aki pasa. Puntra bo mes awor ta dikon. Nos ta muchu lif? Nos mes sa ta ken nos ta? Nos mes ta stima nos mes? Nos ta kla pa sostené loke ta di nos? Nos ta kla pa stòp di koba mama, i splika dikon ta papiamentu nos ta papia’ki? Bai pensa awó! Hasi bo bèst.

E bon yu di Kòrsou

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Kibrando e Taboo – Pareha di Mesun Sexo

Dikon m’a stòp ku sèks