in

Ken mi ta?

Abo ta kompronde bo mes?
Potret foi: Perfect choas

Awe ta di 4 dia ku nos ta pleita. Pleitu tras di pleitu pa kosnan insignifikante, kosnan chiki di kual mi nò ta ni kòrda e motibu mas. Awe ta e di kuater dia den e siman aki, e di binti piku dia den e luna i Dios sa kuantu di e aña. Ta manera nos ta den un sirkulo visioso di guera i deskontentu, un par di dia alegre rondona ku dias di tempestat. Mi ta sinti kon mi ta hoga den laman di rabia, kulpa i malkomprondementu. Mi ke skapa, mi ke lanta kore bai sin regresa. Mi ke kore bai I laga mi mes atras. 

Esaki ta e historia di mi bida, kada un relashon ta para bira un desaster. Ta ami ta asina difisil pa biba kune? Nò tòg? Ami ta bon bon ta NAN ta malu! Si si esaki ta uniko kontesta lógiko. Ta nan nò ta komprondemi, ta nan nò ta skuchami, ta nan nò ta mira mi banda, ta nan a lagami desampara, ta nan a forsami yega akinan, ta nan no a kuidami, ta nan no ta mirami. Ta nan, ta nan, ta NAN. NO TAMI. Ami ta bon bon, mi ta grita mi mes den e spil un biaha mas mientras lagrima ta basha for di mi wowo. 

Mi nò sa mes pakiko mi ta yorando, dikon djis un interkambio di palabra a para bira un diskushon asina formal. Of…si mi ta honesto ku mi mes mi sa bon bon ta dikon. Pero admiti esaki ta nifika ku mi tinku asumi responsabilidat pa mi aktonan. I si nan no ta kla pa admiti loke nan a hasi ami, dikon ami tinku admiti e rol ku mi ta hunga den mi propio miseria? Si nan por tira tur falta riba mi, mas ku klaro ami tambe por hasi meskos bek. Tog…? Anto ta ken ta nan? E tata ku no ta tin ni e desensia pa tin un relashon sano ku mi mama i ta un figura konstante den mi bida? Of e mama ku a hasi tur loke e tabata por finansieramente, pero no tabata sa kon pa atende ku su yu su kurason? Porta “nan” ta e hòmbernan ku mi a habri pia pe, ora mi tabata buska “amor” pa yena e bashi ku mi ta tin den mi paden? Of e muhénan ku mi a permiti huzami pa nan satisfakshon seksual? Ken ta e nan ku mi tin años ta bringa kune aki? 

Mi ta kansa. Atrobe ma pleita, atrobe ma grita, atrobe ma koba mama i atrobe mi a bisa e uniko persona ku ta apoyami pa e bai. Paso mientras e ta aki e lo keda ponemi dilanti un spil i konfrontami ku berdatnan ku mi a bira master den ignora. Mi no ker mira e mucha chiki ku a sinta dos ora warda e tata ku a bolbe keda sin bin. Mi no ker wak e mucha muhé ku no por korda e delaster dia ku e ku su mama tabata kontentu huntu. E mucha chiki ku ta buska kariño serka ken ku ta mi ta prefera di lubide! Mi no tin e kurashi pa mira e teenager ku ta huza esaki pa ta tira su hubentut afo, i kumisa frei un hòmber grandi djis pa un tiki atenshon. Mi no ke sinti e tristeza ku ta drentami ora mi mira e teenager aki sali na barika di un deadbeat ku no ta sirbi pa nada, pero alabes mi tin berguensa di admití kon e relashon aki a kaba. No, mino ke mira ni korda nada di e kosnan aki. Mi ke ta mi so ku mi rabia. Dus e tinku bai!

Paso mientras e ta aki mi no por ta e viktima di tur kos. Si mi no por ta e viktima di tur kos, esei kemen ku porta mi ta responsabel pa algun kos. I si mi ta responsabel pa algun kos mi por kambia, pordona mi mes i hasi miho. Pero dikon ami tinku admiti mi ròl den mi miseria? Dikon ami tinku reflekshona, si ahinda nan nò ta asumi niun tipo di responsabilidat pa e dolor ku nan a kausami? Dikon ami tinku laga lòs na mi rabia? E rabia ku a tenemi kayente ora nan no a mirami, ora nan no a skuchami, ora nan no a komprondemi, ora nan no a kuidami. Laga lòs?! Si mi laga lòs ta kiko a sobra? Si mi no ta e rabia ku mi tin años ta karga aki, e orei ta ken mi ta? Si mi no ta e viktima e orei ken mi ta?? Si mi laga e rabia bai..

KEN MI TA?!

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Rich Kalashh – Routines (prod.by Ox) [Official Music Video]

Mi bida den gara di droga