in ,

Mi tambe!

E artíkulo aki ta un karta públiko pa enkurashá mas hende muhé pa kuminsá papia di nan eksperensia bibando den nos komunidat. E motibu dikon mi a disidí pa skirbi e artíkulo aki ta komo mi a bin komprondé un eksperensia sumamente negativo ku a pasa un bon amiga di mi. Komo un hende hòmber, mi tambe ta kulpabel pa e aktonan ku e artíkulo aki ta bai kontené. 

Lokual ku nos hende hòmber tin ku ripará ta ku nos a desaroyá un komunidat kaminda nos ta privilegiá pa ta hende hòmber. Nos por kana den skuridat bai un toko sin pensa dos biaha ken, kiko i kon e por hasi nos daño. E echo aki ta lamentablemente e realidat di nos rumannan, nos mamanan, nos tantanan i nos amiganan. 

Den e artíkulo aki mi amiga a disidí pa konta su testimonio. Mi a haña outorisashon di dje pa kompartí su eksperensia, pa esaki no pasa ku ningun otro persona mas. 

‘Mi ta kere hende hòmber mester realisá nan mes privilegio. Mi no a pidi bu pa kumpra algu p’ami, pa despues bo bai ku mi den un area no habitá pa bo roga mi sèks. Si mi a bisa bo promé mes ku mi tabata ke sèks i mi a kambia mi desishon, bo tin ku aseptá esaki.
I sigur mi no a pidi bo pa siña mi kon pa tene relashon seksual! 

‘Mi tabatin 17 aña ora ku mi a hañami ta tene relashon seksual ku mi manipulador. 

E persona aki tabatin mas ku 30 aña i tabata un mayor di un amiga di mi. Mi tabata den un relashon i mi tabata bringando ku mi outoestima. E gai aki tabata sa di mi problemanan i a kapitulá riba esaki. 

Mi tabata bon ku mi amiga i su famia pa añanan largu kaba, mi tabata bai nan kas. Nos tabata konta otro di otro su problemanan i e tata tabata sa di mi outoestima. Bo por imagina bo kon e persona aki tabata konsola mi den mi tristesa. 

Ami ta yama esaki e “long con”
E tata a aserka mi i bisa mi ku e lo train mi pa ta miho den sèks ku mi pareha i a splika mi kon su pareha no tabata satisfasé korektamente. Kòrda ku mi a kultivá un konekshon ku e persona aki. Mi a komplasé despues di hopi manipulashon. E tabata pone mi hasi sèks oral so, komo ku esaki tabata sigun e lokual mi no tabata sa i tambe lokual su pareha no tabata dune.

E promé biaha el a primintí mi ku nos lo a hasi un aktividat ku semper mi ke a hasi, nos a bai na e luga i e tabata aislá. E a hunga tur su kartanan. E tabatin mi den su poder: e tabata mi transporte, nos tabata nos so i mi outoestima tabata abou. Esaki ta promé biaha ku e a manipula mi pa hasi sèks oral.

Esaki a sigui bai pa kasi un aña. 

Mi a akusá mi mes pa no por a kore bai. Mi a akusá mi mes pa no a para riba mi nò. Pero awor aki mi por ripará kon bon planiá i ehekutá e manipulashon tabata i esaki ta hasi mi malu, malu den mi ser pa por a stòp e kos aki di pasa.
E tabata tata di mi mihó amiga. Mi no a bisa mi amiga nada pa no kibra e imagen ku e tin di su tata. Mi no a bisa pa no kibra un famia. Pero primeramente mi no a bisa pa e no tuma mi na malu. 

Ora ku mi a habri mi mes tokante e kos aki, hende tabata deskurashami pa mi aktonan, ku mi a aseptá, kiko mi tabatin bistí, i kiko mi tabata sa. Nan ta akusa mi di hunga e víktima! Defakto ma stòp di papia. E hòmber aki a silensia mi. Nò, komunidat a silensiami i protehá e hòmber aki. 

Mi a bin komprondé ku mi no tabata e uniko víktima, mas amiganan komun a habri i konta mi nan eksperensia ku e hòmber aki. Kon e tabata hasi nan inkómodo ku su avansenan seksual i kon unu a pasa den un situashon similar.’

E historia aki tabata hopi difísil pa konta i e historia aki ta reflekshoná un di e miles di eksperensianan difísil ku nos hende muhénan ta pasa na man di nos hende hòmbernan. E artíkulo aki no ta pa akusá nos hende hòmbernan , pero pa lanta un diálogo kon nos por tuma responsabilidat. Nos tin ku shift e narrative for di mira nos hende muhénan komo humanonan di klase menor. Nan ta nos rumannan i nos mamanan. 

Pa muchu largu kaba nos kultura ta silensiá nos hende muhénan i hasi nan vulnerabel. Nos a laga mal hòmbernan bai sin kastigu i nos a kita poder mismo di nos mamanan. 

Na aña 2006 mundu a konose e prome movementu ‘me too’ i na aña 2017 e movementu aki a bolbe bira relevante. E a lanta un diskushon riba medionan social ku a kaba ku hopi enkarsamentu di manipuladornan manera R.Kelly i Weinstein. Strañamente, e movementu aki a bula Kòrsou. No remarkabelmente ta den paisnan “desoroyá”, kaminda e grado di igualdat di sekso ta mas balansá e movementu aki tabata mas “eksitoso”. Sigun Nashonan Uní, un den sinku hende muhe, ku partner òf sin partner, a eksperensia avansenan sexual no deseá.
Esaki ta nifiká ku tin probablemente diesshete mil kaso di avansenan seksual na Kòrsou i sigun Curaçao Bureau of Statistics, 1.7 proshento di e poblashon femenino ta reportá kasonan di avansenan sexual.
Pa muchu largu nos ta silensiá nos hende muhénan dor di nos kultura di machismo. Nos tin ku kibra e piatrahia aki ku venena nos komunidat, kaminda ta pordoná I protehá manipuladornan komo nan ta esun ku ta trese pan. 

Mi ta roga boso lesadornan, si bo tin un historia, kont’é. No keda ketu!
E diskushon aki mester kuminsá. 

Fuente

United Nations. (2020). Goal 5: Achieve gender equality and empower all women and girls. Retrieved from UN Sustainable Development Goals: https://www.un.org/sustainabledevelopment/gender-equality/

Curaçao Bureau of Statistics. (2014, november). Criminaliteit en de opinie van respondenten over herstelrecht op Curacao in 2014 . Retrieved from Curaçao Bureau of Statistics: https://www.cbs.cw/document.php?m=1&fileid=4687&f=efefa534838f0746fd0f96b6228abe45&attachment=0&c=1381

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

KENITOOHLEAKS: Kenitooh – "01" (Prod. By Trapcase)

Rich Kalashh – Routines (prod.by Ox) [Official Music Video]