in

Preguntanan tokante Coronavirus: Parti 2

Si bo no a lesa parti 1, chèk e aki.

Dia 1 di desèmber 2019 mundu a ofisialmente sera konosí ku e Coronavirus Disease 2019 (COVID-19) ku a originá den e merkado di animal eksótiko na Wuhan, China. For di e dia aki, e virùs a plama rònt mundu i a wòrdu deklara un pandemia pa World Health Organisation. Na momentu di skirbi e artíkulo aki, 395.814 kaso di infekshon a wòrdu konfirmá mundialmente, kaminda 103.748 hende a rekuperá i 17.235 a muri. Lo ke mi ke pa nos tur komprondé ta ku nos ta den un krísis mundial i ta importante pa tur hende kooperá i ta solidario ku otro.

Mi lo skibi diferente artíkulo kaminda mi lo kontestá preguntanan tokante COVID-19 pa bo por ta mihó informá tokante e situashon mundial i kiko e por nifiká pa abo i nos islanan. Esaki ta parti 2. Tambe mi ke pone atenshon riba diferente fake news ku ta pasando rónt. No konfiá kiko ku ta ku a wórdu mandá pabo via media sosial! No drenta pániko! Keda trankil, lesa e artíkulonan aki i otro fuentenan ofisial. Mi mes ta un mikrobiólogo, no un epidemiólogo, pero mi ke usa mi abilidat i konosementu pa kompartí informashon importante tokante e krísis aki pa tene hende informá. Tene kuenta ku e situashon ta desaroyá kontinuamente i informashon den e artíkulonan por bira antikuá. Lo mi purba keda aktualisá e informashon i agregá informashon nobo mas lihé ku ta posibel. 

Klek aki pa sigui kon e malesa ta plama mundialmente. E wepsaitnan di e gobièrnunan di Aruba, Boneiru i Kòrsou tin informashon tokante e situashon riba e islanan. Si bo tin pregunta òf komentario, manda nos un mail na bohimio@icloud.com i lo mi purba kontesta bo pregunta!

Kiko por hasi pa prevení haña COVID-19?

Keda kas i laba man frekuente! Awor gobièrnunan ta tumando medidanan drastiko. Skolnan a sera, buelonan a stòp ku no ta siudadano regresando bek na nan pais, i negoshinan ta sera temporalmente. Ta pidi pa tur hende keda kas i evitá kontakto ku otro hende mas tantu ku ta posibel. Pues si bo no por bai traha i no tin un bon motibu pa sali, keda kas! Evitá kontakto físiko mas tantu ku ta posibel. Mantene distansia di sikiera 2 meter for di otro hende ora bo ta den públiko. E medidanan aki ta tumá pa redusí kontakto entre hende, pero ta depende riba nos tur pa tuma e rekomendashonnan serio i keda kas mas tantu ku ta posibel. No sali den grupo! E medidanan aki ta yama distansiashon sosial (social distancing). Menos kontakto tin, menos fásil e malesa lo por plama i mas seif tur hende lo ta. Banda di esei, labamentu di man ta super importante (mira e siguiente pregunta)!

Laba man ku habon ta traha di berdat?

Laba man ku habon ta hopi efektivo pa mata e vírùs si e ta riba bo mannan. E habon ta kibra e vírùs i hasié inefektivo. Banda di esei, mester limpia lokual bo ta mishi kune frekuentemente, manera man di porta.

Tin kura pa COVID-19?

Na e momentu aki no tin kura pa COVID-19. Rónt mundu ta buskando pa un kura òf pa medisina ku por aliviá e síntomanan. Ya tin diferente estudio ta tèst medisinanan konosí pa wak si nan ta traha kontra di COVID-19 tambe. Tin par ta mustrando promesa, pero tin ku warda wak kiko e tèstnan lo demonstrá. Banda di esei tin desaroyo di un vakuna (vaccine). Esaki lo duna personanan imunidat kontra COVID-19 i lo ta krusial den prevení e malesa di plama i kousa mas morto. Si e tèstnan klíniko demonstrá un vakuna su efisensia kontra di COVID-19, e lo wòrdu implementa na gran eskala mundialmente. Probablemente esaki lo bai dura un par di luna promé ku e bira realidat.

Mi a menshoná na e sekshon “kiko ta coronavirus?” ku e ta un tipo di vírùs kual por akumulá mutashon lihé i kambia. Esaki lo por pone ku e vakuna su efektividat no lo ta duradero i ku lo mester desaroya un vakuna nobo kada aña, meskos ku grip. Pero investigashonnan nobo ta indiká ku esaki no ta e kaso pa SARS-CoV-2, pues e vakuna ku lo wòrdu desaroyá su efektividat hopi chèns lo ta duradero. Esaki ta bon notisia!

Awa salu, temperatura haltu of vitamina C ta mata coronavirus?

Tin hopi fake news ta bayendo rònt tokante di COVID-19. Spula boka ku awa salu no lo mata e vírùs. Temperatura riba 26-27° C no lo mata e vírùs. COVID-19 ta plamando na paisnan mas kayente tambe. Tin un video tambe ta bai rònt kaminda un “PhD” ta bisa ku sauna lo mata e vírùs i ku por usa un feun den boka tambe pa mata e vírùs. No tin prueba ku esaki ta efektivo i ta puramente spekulashon. Tuma vitamina no ta yuda kontra e vírùs. Tuma vitamina en general ta algu ku no ta nesesario si bo tin un dieta balansa of un defisiensia. E idea ku vitamina C ta protegé kontra di malesa ta hopi popular, pero no tin prueba ku ta sostené esaki. Vitamina C ta importante pa mantené funshon di bo sistema di imunidat, pero si bo ta haña sufisiente den bo dieta, mas vitamina C no ta duna mas protekshon. Esaki ta kai den liña ku e idea general di “boost” bo sistema imunológiko. Bo no por “boost” bo sistema imunológiko. Bo por solamente sòru pa e traha normal i esei bo ta hasi dor di ta kome salu i hasi ehersisio regularmente. Kidou ku produktonan ku ta alegá esaki. No tin prueba sientífiko ku ta sostené lokual ta wòrdu pretendé. World Health Organisation tin un wepsait dediká na e tipo di fake news aki.

Hende pretu ta resistente kontra coronavirus?

No tin prueba ku esaki ta berdat. Ademas e por ta un kerensia peligroso ku por pone ku hende pretu lo aktua na un manera ku ta hisa nan chèns pa wòrdu kontagiá i plama COVID-19. E idea ta bini for di e echo ku tin tiki kaso na paisnan riba e kontinente di Afrika. Pero por tin diferente motibu pakiko esaki por ta asina. Movementu di hende entre e paisnan, e densidat di e populashon, e kantidat di tèstnan ku ta wórdu hasi i kon data mediko ta wòrdu raportá tur por influensiá e kantidat di kasonan konfirmá. Tambe e malesa por a djis yega e kontinente mas lat kompará ku oropa i lo dura mas promé ku e sifranan subi. Tin par di pais tambe ku tin eksperensia ku Ebola i pues lo ta mas miho prepará pa dil ku COVID-19. E kandidat di kasonan ta subiendo na e paisnan aki si.

Kon e lo afektá nos salu i ekonomia?

Awor ku hopi hende ta kedando kas, hopi negoshi ta drai pèrdida. Tambe tin hopi hende ku no por kobra e tempu ku nan mester a keda kas. Tin hende ku lo pèrde trabou. No lo bai tin turistanan pa un temporada. Nos ekonomia lo praktikamente para i esaki ta pasando rònt mundu. Nos sistemanan ekonómiko i sosial no ta traha pa deal ku un situashon asinaki i no ta protegé esnan mas vulnerabel. Ta importante pa para huntu ku otro komo pueblo i sostené otro. Aworaki hende ta kore bai kumpra yen kos na supermarket pa warda na kas. Si un par di hende sali kumpra yen kos, nos lo krea un skarsedat di produkto pa esnan ku ta mas pober i vulnerabel. E ta kompletamente inesesario i ta hasi otro daño, pues no hasié! Sigui kumpra normal manera semper paso tin sufisiente pa nos tur!

Fuentenan

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 1

Upvotes: 1

Upvotes percentage: 100.000000%

Downvotes: 0

Downvotes percentage: 0.000000%

MI€K X Icy X Kenitooh – BIN BON (Prod Trapcase)

Marsh ft Dezz – Awaseru