in

Preguntanan tokante Coronavirus: Parti 1

Pa parti 2, klek aki.

Dia 1 di desèmber 2019 mundu a ofisialmente sera konosí ku e Coronavirus Disease 2019 (COVID-19) ku a originá den e merkado di animal eksótiko na Wuhan, China. For di e dia aki, e virùs a plama rònt mundu i a wòrdu deklara un pandemia pa World Health Organisation. Na momentu di skirbi e artíkulo aki, 395.814 kaso di infekshon a wòrdu konfirmá mundialmente, kaminda 103.748 hende a rekuperá i 17.235 a muri. Lo ke mi ke pa nos tur komprondé ta ku nos ta den un krísis mundial i ta importante pa tur hende kooperá i ta solidario ku otro.

Mi lo skibi diferente artíkulo kaminda mi lo kontestá preguntanan tokante COVID-19 pa bo por ta mihó informá tokante e situashon mundial i kiko e por nifiká pa abo i nos islanan. Esaki ta parti 1. Tambe mi ke pone atenshon riba diferente fake news ku ta pasando rónt. No konfiá kiko ku ta ku a wórdu mandá pabo via media sosial! No drenta pániko! Keda trankil, lesa e artíkulonan aki i otro fuentenan ofisial. Mi mes ta un mikrobiólogo, no un epidemiólogo, pero mi ke usa mi abilidat i konosementu pa kompartí informashon importante tokante e krísis aki pa tene hende informá. Tene kuenta ku e situashon ta desaroyá kontinuamente i informashon den e artíkulonan por bira antikuá. Lo mi purba keda aktualisá e informashon i agregá informashon nobo mas lihé ku ta posibel.

Klek aki pa sigui kon e malesa ta plama mundialmente. E wepsaitnan di e gobièrnunan di Aruba, Boneiru i Kòrsou tin informashon tokante e situashon riba e islanan. Si bo tin pregunta òf komentario, manda nos un mail na bohimio@icloud.com i lo mi purba kontesta bo pregunta!

Kiko ta coronavirus?

Coronavirus ta un famia di vírùs ku ta kausa malesa den para- i mamíferonan (zoogdier), pues tin diferente tipo. Coronavirus a wórdu diskubrí den añanan 1960 i tin 7 tipo konosí ku ta kontagiá hende, inkluso esun nobo. Na aña 2002 tabatin un epidemia di Severe acute respiratory syndrome (SARS), kual tambe tabata kousá pa un tipo di coronavirus. Esun nobo yama ofisialmente severe acute respiratory syndrome coronavirus 2, òf SARS-CoV-2 i ta kousa e malesa COVID-19. SARS-CoV-2 ta un tipo di vírùs ku ta yama RNA vírùs. E tipo di vírùsnan aki ta akumulá mutashon i kambia lihé kompará ku otro tipo di vírùsnan. Investigashonnan nobo ta indiká ku SARS-CoV-2 no ta kambia asina lihé manera tabata spekulá. Esaki ta nifika ku chèns ta chiki ku e lo bira mas of menos peligroso. Tambe esaki ta nifiká ku e efektividat di medisinanan i vakuna ku nos lo desaroyá lo ta probablemente duradero.

For di unda e e SARS-CoV2 a bini?

Ta sospecha ku e vírùs a bini for di un raton djanochi, spesífikamente e. Esei lo a kontagiá un pangolin i esei en turno lo a kontagiá un hende. Ratonnan djanochi mes ta konosí pa ta un reserva pa diferente tipo di malesa, por ehèmpel e vírùsnan Ebola, SARS-CoV-1 i Rabies. Tin diferente vírùsnan humano ku a bin for di animalnan. E Grip Spaño kual a mata miyones di hende na 1918 a bini for di para. E konsentrashon di diferente tipo di animalnan na e merkado di Wuhan ta krea kondishonnan optimal pa vírùs transmití for di bestia bai hende. Vox tin un bon video splikando e situashon di e merkado aki. Nos relashon destruktivo ku naturalesa i e manera ku nos ta kultivá i kome animal na gran eskala semper lo presentá un riesgo ku nos lo kontraé malesa.

Kiko ta síntomanan di COVID-19?

E síntomanan mas komun ta keintura, tosamentu, kansansio i problemanan ku hala rosea. E ta similar ku grip of ferkout i ta difisil pa distinguí for di otro. Grip su síntomanan ta eskalá mas lihe, tanten COVID-19 i ferkout su síntomanan ta eskalá mas poko poko. E símtomanan lo manifesta entre 2-14 dia despues infekshon. Tin indikashon tambe ku hopi pashènt tin diarea òf sakamentu. Den e potret abou bo por mira tur e síntomanan ku a wórdu observá te ku awoki. E grandura di e sírkulo bèrdè ta indiká kon frekuente e síntoma ta aparesé. Mas grandi ta nifiká mas frekuente. Nota esaki por kambia ora mas informashon ta konosí.

Fuente: Popular Science

COVID-19 ta peligroso?

Si, e ta peligroso. E ta plama lihé i bo por plam’é promé ku bo bira malu di bèrdat. Wak e figura abou. Depende na kon lihé e plama, kuantu hende hañ’é anto kiko e kapasidat di e sistema di salubridat den un pais ta, e por resulta na hopi morto. Nos kapasidat ta hopi abou! P’e motibu aki ta importante pa tuma medidanan pa baha e velosidat di e plamamentu. Hendenan di edat 60 bai ariba i hendenan ku tin kondishonnan médiko ta esnan ku tin e riesgo di mas haltu pa drenta estado krítiko i muri. Mitar di pashèntnan den intensive care ta hendenan yòn. Hendenan ku a rekuperá por sufri di daño permanente na nan pulmonnan. Asta si bo ta yòn, e konsekuensianan por ta grave.

Kon COVID-19 ta plama?

Si bo tin e vírùs den bo sistema, bo por plam’é primeramente dor di tosamentu. E drùpelnan chikitu ku ta sali ora bo tosa of nister ta karga partíkulanan di e vírùs. Un otro hende por hala esaki aden i haña e vírùs. Si bo tosa of nister den bo man, bo por plama e vírùs dor di mishi ku otro hende of ku opheto ku otro hende ta usa, manera man di porta. Si bo mishi ku bo boka, wowo of nanishi, e vírùs ta pasa di bo man, drenta bo kurpa i kousa malesa.

COVID-19 a yega nos islanan kaba?

Si. Na Kòrsou tin 6 kaso konfirmá, e promé persona a fayasé i dos a kura di e malesa. Na Aruba tin 12 kaso konfirmá, inkluyendo hende lokal. No tin kaso konfirmá na Boneiru ahinda. E echo ku tin kaso konfirmá ta indiká e posibilidat ku tin mas hende ku tin e malesa, pero no a wòrdu di tèst ahinda. Esaki ta nifiká ku ta super importante pa tuma medidanan pa prevení e plamamentu di COVID-19 mas tantu ku ta posibel i pues prevení mas morto. E realidat semper lo ta piho ku lokual e sifranan ta mustrando.

Den parti 2 lo mi kontesta preguntanan tokante kiko abo mes por hasi pa tene bo mes seif, ki tur ta fake news i kon e lo afekta nos salú i ekonomia.

Fuentenan

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Ir-sais – Chaka

Sidney – Perdoname