in ,

E kura pa Gainan desgrasiado

Gai desgrasiado; Kòrsou su fuckboys. Nan no mester di introdukshon; puntra bo amiganan, kada unu a topa ku un òf mas di e tiponan ei den su bida. Nan ta gaña pero nèt sufisiente pa no lanta sospecho, ora nan bisa e bèrdat ta sea pa bo haña duele òf pa bo kere ku si e por ta honesto tokante e kos aki, lo e no gaña tokante sobrá. Tin di nan no ta gaña at all pero nan ta tenebu sufisiente na liña pa haña loke nan ke sin wòri ku bo sintimentu. Nan tin triki for days pa hunga ku bo kurason pero pió ainda nan ta ponebu sinti ku ta abo a hasi algu robes.

Hinter mi bida seksual a kuminsá ku un di e tiponan ei, esaki ta un di esnan ku ta buska muchanan yòn ainda, mas yòn ku nan. Muchanan manera ami e tempu ei, 17 aña, boka grandi mané mi so pero di paden mucha inosente ku no sa di nada mashá. E tabatin frei pero dimes e no a bisa esei anto ora ma haña sa e la pegami ku e klásiko “si pero unbé nos tei kibra. Anto no ta nada tòg paso ta e a kòrta mi orea promé”. Nunka no ta nan falta, nan no a hasi nada, víktima nan ta.

Despues di su lunanan di sweet talk e la haña su chèns ku mi; ma bisa nò un par di bia pero despues mi a aseptá numa pa tene relashon seksual kuné paso segun e “bo sa bon, bon ku bo ke”.
Otro di e strategianan, borderline assault, kaminda nan ta maluzá e poder ku nan tin riba bo pa fòrsabu hasi kosnan ku bo no ke òf bo no ta kla pe ainda; den mi kaso: sèks. Bo ta konvensí ku bo ta namorá, ku e ta esun i ku niun otro gai no ta stimabu manera e lo por. Niun di esakinan no ta bèrdat pero e tin su forma di keda persistí, keda ripití te ora bo kere ku ta bèrdat. Pió ainda si bo ta den un momentu kaminda situashonnan di bida tin bo abou, si e ta mas grandi ku bo i/òf ta ponebu sinti ménos.

Nos tur tin momentu den bida ku nos ta kai pa tipo di kuentanan asina. Esei ta prueba ku bo tin sentimentu i ta humano, e no ta hasibu debil, e ta hasi e otro persona un desgrasiado. A tumami par di aña pa mi realisá esei  mi mes. Despues di e promé biaha mi a sintimi hopi malu. No ta djis e doló pero e pensamentu ku mi a hasi algu ku mi no tabata ke. Tòg mi a keda atendé ku n’e paso den mi kabes a nase un duda ku e por tin rason “mi mes tabata ke tòg?” E echo ku el a keda yamami ‘su señorita’ no a yuda. E tabata kòrdami kada bes ku maske kuantu mi no gust’é, pa semper lo mi keda di dje paso ta e a kue mi promé. Ku tempu mi a bin hala pia, pero mi no por a pordoná mi mes; e mini-me di 17 aña ei pa ami tabata un mucha kèns, idiot, demasiado debil. E kos a yega asina leu ku mi a pusha basta memoria di e tempu ei manda abou paso mi no por aseptá ku ta ami mes a pasa aden. El a ponemi duda den mi otro relashonnan tambe; mi ta hasiendo esaki pa ami mes òf pa e gai?

Meskos asina tin mas hende muhé ku e tendensia di sufri den skondí, tin biaha nos tin bèrgwensa di asta bisa nos mihó amiga paso bo no por kere kon bo a kai pa un mentira asina. Loke ta hasi nos bida mas difísil ta ku tin hopi “brò”  ta hunga ròl bisa ku ta drùk nos ta hasi, ‘ta bosnan mes ta kis gainan malu’. . .  Tin di nan sa bon bon kiko e amigu ta hasi pero ta keda ketu hunga ròl pa ora ta nan bùrt e amigu tambe hunga e mesun ròl. Shout Out spesial pa tur e gainan ku a kuminsá reklama tokante e título sin a ni sikiera lesa e teksto.

P’esei nos tur mester di un Chichi, un ruman muhé grandi ku ta tende i konsehá bo sin husga. Chichi semper tin e peptalk ku abo tin mester pa yudabu lubidá riba e gainan ku ta desgrasia bo bida, un rekordatorio ku bo ta f-ing fierce. Ami a kana rònt yen bèrgwensa i duda paso mi no tabatin un Chichi. P’esei mi t’ei bira Bo Chichi; niun hende no mester pasa den algu asina nan so. Mandami bo historia anto mi ta nabu un kontesta.  Kuminsando ku mi mes:

Kerido Ami.,

No ta bo falta. Stòp di kastigá bo mes pensando riba dje i kiko e la hasi, mini-M.E. no tin niun falta.

E gai ei por tabata e promé pero definitivamente no e mihó. Na fin di dia virginidat ta djis un konsepto pa pone e hòmber sintié special. Niun hende no ta wòri ku hòmber ta tene relashon seksual pero e muhé si mester ta vírgen. Gainan asina no tin e webunan sufisiente pa sèks ku muhénan eksperensiá ku por bisa nan presis kon malu nan game ta.
Ademas, sèks no ta determiná bo balor. Bo ta un pal’i muhé; own it; ta oké pa bo tene relashon seksual ku ken ku bo ke anto ta oké tambe pa bo bisa nò. Basta bo disidí pa bo mes promé i no hasi algu djis paso e otro ke.

Ku hopi amor,

Chichi

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

TitoRasz X Tru G X Lil Homie – Pordona (prod. Tahjmoneyy)

Devi Dev x Lens – Bibando (prod. Troublemakerhank)