in

Refutashon – LISTA di PREOKUPASHON di PUEBLO di KÒRSOU pa ku LEI di Matrimonio entre personanan di mesun sekso

Dia 12 di yüli último, Asosashon di Misa a mustra nan disgustu di e moshon pa legalisá matrimonio di e mesun sekso. Durante e protesta, nan a trese dilanti un konsepto di lei nobo pa “salbaguardia e famia”. E konsepto di lei ta lo siguiente:

“Proposed Paragraph 2: A marriage will exclusively exist between a biological man and a biological woman.
No rights, rules or benefits that belong to marriages will be granted to other forms. Other forms of unions of any kind between persons are not recognized in any way.” (Curaçao, n.d.)

E konsepto akí lo tin ku bai den nos konstitushon, nos “grondwet” i hasi mas difísil pa por kambia e lei den futuro, si nò imposibel. Asosashon di Misa no ta mira mas leu ku nan nanishi i nan ta deseá di mete den bida di suidadanonan ku no tin akto ni benefisio den e organisashonnan religioso.
Aparte di e prosupuesto di kambio di lei akí, nan a publiká un manifesto pa splika dikon nan ta para asina fuerte tras di nan puntonan. E manifesto akí ta duna sinku motibu dikon, segun nan, nan por interumpí bida di otronan sin motibu legal. Mi ta skirbì e artíkulo akí komo un Yu di Kòrsou, lantá den misa i komo un suidadano biseksual ku ta forma parti di nos dushi Kòrsou. Mi lo ta ophetivo, maske e protesta aki a yega tera serka mi.

Kada un di e motibunan stipulá dor di Asosashon di Misa su manifestashon ta un produkto di malkomprondementu i ignoransia. Mi ta bai splika den e artíkulo akí dikon kada un di e puntonan presentá, no ta solamente robes, pero tambe kompletamenta dañiño pa e públiko ku ta sigui e Asosashon di Misa i sobranan.

E manifesto ta publiká riba:
https://www.vigilantekorsou.news/2019/07/12/lista-di-preokupashondi-pueblo-di-korsou-pa-ku-lei-di-matrimonio-entre-personanan-di-mesun-sekso/?fbclid=IwAR0b7AoOViL5mlf2a0SLlv2_pDWE44VnDhN8164XW3XXgx5WUkZUg0NCvBo (Asosashon di Misa, 2019)

E prome punto ta bisa:

“Preokupashon ku “Comprehensive Sexual Education” CSE ku ta ser sostené dor di Nashonnan Uní lo keda aseptá pa nos Gobièrnu. Esaki lo tin komo konsekuensha ku muchanan edat di ocho aña pa ariba lo keda instruí kon pa praktiká entre otro sèks oral, masturbashon, sèks ku personanan di e mesun sekso i tambe lo instruí nan tokante benefisionan di sterilisashon i aborto.”


E punto akí ta bisa ku Kòrsou no mester aseptá e CSE komo e ta dañiño pa hobenan, komo ku esaki ta “instruí” hobennan kon pa hasi aktonan seksual.
Na promé luga, falta di informashon i kuríkulonan di sekso ta e rason dikon hopi hóben no tin konosimentu basikó di nan kurpa i aktonan sexual, kual por resultá na embaraso hubenil i malesanan venériko. Hopi informashon no ta malu, falta di informashon ta malu. Hóbennan di awendia ta ser konfrontá mas trempan ku seksualidat i ta importante ku nan ta bon informá. Bon informashon ta nifiká ku ta kubri tur aspekto di seksualidat, no solamente seksualidat hétero, pero tambe tur e otro formanan di seksualidat. Aparte di esaki, seksualidat hetero no ta solamente sekso vaginal, e ta enkorporá mas ku esaki, por ehèmpel; sekso anal, oral i uso di ophetonan seksual. Kada práktika ta karga nan mes graduo di rísiko i manera di protekshon. Nos mester amplia nos manera di duna informashon seksual, komo ku e manera heteronormativo, NO ta e úniko manera asta no ta hende hétero só ta eksisití.

E di dos punto ta stipulá:

“Preokupashon pa ku Ideologia di Género ku ta trese un konfushon seksual i mental enorme den mucha i hóbennan partikularmente esnan den edat di pubertat ku ta pasando den e fase di desaroyo di nan identidat. Ora ku hormonanan seksual kuminsá funshoná, ta bira hopi difísil pa ehersé dominio propio si tin konfushon riba Gender ID.”

Oké, nos tin ku kompronde algu bon, orientashon seksual i ekspreshon di género ta dos konsepto separá di un persona su identidat. Por èhempel, di un banda por tin un persona transgénero homoseksual i di otro banda por tin un person transgénero heteroseksual. Ekspreshon di género no ta determiná orientashon seksual. Un hóben drentando adolesensia lo konfrontá tur e dos askpektonan den desaroyo di su identidat. Ningun dos aspekto e no por kontrolá. Pero, nos sí por kontrolá kon nos ta anda ku e realidat ku e hóben akí tin un diversidat. No tin ningun aspekto ambiental ku por kambia e hóben su orientashon seksual òf ekspreshon di género. Solamente preshon inesesario di su ambiente por hasi daño riba su desaroyo. Por ehèmpel, e práktika destruktivo di fòrsa un hóben di aktua un manera ku e no ta, komo misanan ya tin ta hasi pa siglonan kaba.

E di tres punto ta stipulá:

“Preokupashon ku Fuente di entrada ora ku LGBT risibí rekonosementu i matrimonio entre personanan di mesun sekso keda aseptá komo algu normal den nos komunidat, sierto negoshi i trahadónan ku nenga ehekutá trabounan ku ta relashoná ku matrimonio homo manera dòrnamentu di bolo pa matrimonio homo, printmentu di T shirt pa LGBT etc. lo por risibí but òf lo por asta pèrdè nan trabou pa motibu ku ta konsiderá ku nan ta diskriminá”

Den nos konstitushon “grondwet” ta stipulá den artíkulo unu; “Allen die zich in Nederland bevinden, worden in gelijke gevallen gelijk behandeld. Discriminatie wegens godsdienst, levensovertuiging, politieke gezindheid, ras, geslacht of op welke grond dan ook, is niet toegestaan.”
E artíkulo unu akí ta enserá ku tur forma di diskriminashon, entre otro, orientashon seksual, ekspeshon di género i religion no ta aseptabel. Artíkulo unu ta na figor pa años kaba, for di aña 1815 pa ta esakto. Ku e lèi di matrimonio legal entre dos persona di mesun sekso pasa si òf nò, e no ta habri kaminda pa mas diskriminashon. Al kontrario, e lèi aki ta kibra diskriminashon inesesario imponé dor di nos antepasadonan ku e artíkulo unu no a protehá na promé luga. Tin keho di diskriminashon di orientashon seksual den sektor laboral sin e lei aki i mi ta duda ku e kantidat lo subi. E problemátika stipulá aki’riba ta un reakshon di e situashon na Estadosnan Uní. E realidat aki tabata tei semper, solamente despues di 2015 el a bira mas transparente. Si e empresarionan no ker ta bòu di e “spotlight” di diskriminashon, nan no mester diskriminá. Si no, kada persona i empresa tin derechi di trese nan desakuerdonann dilanti korte, mesun kos ku e personan i empresarionan na Estados Uní a hasi. No tin eksepshon.

E di kuater punto ta stipulá:

“Preokupashon pa ku nos desaroyo ekonómiko. Prosperidat ta mará na moralidat, famianan fuerte, kantidat di matrimonionan eksitoso ku yunan ta dependé riba dje, abilidat general di dominio propio i prinsipionan di étika. Nos tin basta problema kaba ku sèks parotin, malesa venériko, embaraso no deseá, aborto i divorsio. Segun investigashonnan sèks entre dos hende hòmber ta kousa 40 biaha mas kasonan di HIV ku sèks hetero. Na Kòrsou e medisinanan ta kosta alrededor di 30 mion pa aña. Pa nos añadí promoshon i konfushon ku matrimonio homo lo trese ta un paso enorme den direkshon robes. Preokupashon pa ku Homo Promo Kon nos lo por bringa promoshon di aktonan homoseksual i transgender si e ta legal? Gran mayoria di mayornan no ke homo promo pa nan yunan, pero nan lo no por risibí sosten di gobièrnu pa para kontra esaki pasobra ta algu legal. Ken lo tin último outoridat kiko ta wòrdu instruí na nos muchanan (yunan)?”

Pa ta honesto, e punto aki ta esun di mas problemátiko. Tin tantu mal komprondementu; Na promé luga, prosperidat no ta mará na moralidat. Moralidat ta un konsepto personal, moralidat ta duna direkshon na un persona su aktuashon i pensamentu. Tur hende tin un forma di moral, nan mes kompas den e mundu akí. Un su moral por ta mará na un instituto komo misa, pero esaki no ta e norma. Prosperdiat ekonómiko ta mas mará na un persona su “budgetering” i no na su moral. Institutonan komo misa no ta apto pa duna konseho finansiero, ta pa esaki nos tin “accountants”.

Na di dos luga, “famianan fuerte I matrimonionan eksitoso ku yunan ta depende riba dje”. Estudionan tras di otro (Usakli, n.d.), (Manning , Fettro , & Lamidi, 2014), (Bos, Knox, Gelderen, & Gartrell, 2016) ta prueba ku un yu (hóben) ta eksitoso den un ambiente sano i enkurashativo. Esaki por ta un ambiente di un matrimonio heteroseksual, pero tambe homoseksual. Esaki por ta un ambiente di mayornan soltero òf den matrimonio. Tin estudionan hasí ku ta mustra e benifisio di un hóben den un ambiente ku un mayor òf dos. Den estudionan aki, ambos matrimonionan (hetero/homo) a saka afó ku un ambiente ku dos mayor ta mas favorabel. Esaki no ta baha e importansia ku e ambiente mester ta sano. Un matrimonio eksitoso no ta nifiká ku e ambiente ta sano. Eksitoso ta nifiká diferente kalidatnan pa diferente prinsipionan. Si nos sigui e prinsipio di misa, ku matrimonio ta un akto pa prokreá, esaki no ta nesesariamente eksitoso. Prokreashon ta fasil i ta pasa pafo di matrimonio. Pa konklui, un hobén no mester di mayornan den un matrimonio eksitoso, e mester di mayornan ku ta krea un ambiente benifisioso i no ta importa kon e famia (ambiente) aki su forma ta.

E punto di aborto mi ta preferá diskutí den un siguiente artíkulo. E punto di sekso parotin ta komun, e ta pasa, nos mester ta mas habrí pa papia tokante e tópiko. Mi a menshoná e problema di informashon di sekso den punto unu ku ta trata malesanan venériko i embaraso hubenil.

“Segun investigashonnan sèks entre dos hende hòmber ta kousa 40 biaha mas kasonan di HIV ku sèks hetero. Na Kòrsou e medisinanan ta kosta alrededor di 30 mion pa aña. Pa nos añadí promoshon i konfushon ku matrimonio homo lo trese ta un paso enorme den direkshon robes.”

World Health Organisation i Blood banks tabatin un dilema ku e mesun problema stipulá. E investigashon hasí tabata kompletamente diskriminatorio komo e ta boga ku sekso hetero i sekso homo ta eskisti. Orientashon seksual homo i orientashon seksual hetero ta eksistí. Si hende praktiká sekso anal, nan ta kore mas riesgo pa HIV ku sekso vaginal. Esaki no ta nifika ku sekso vaginal no tin su risikó. Personan heteroseksual tambe ta hasi sekso anal. Pa motibu di esaki tur dos organisashon a deskreditá e investigashon aki i a baha e medidanan imponé riba parehanan homoseksual. Medisina kontra HIV ta karu i ta p’esaki nos tin ku traha riba prevení. Pa nos por prevení, nos mester di bon informashon. Ta plenamente p’e rason akí Nashonan Uní a trese dilanti e CSE. (Punto unu)
Siguiente punto, e promoshon di matrimonio homoseksual no tin ningun influensia riba e akto di homoseksualidat. E kantidat di homoseksual no lo aumenta diripientemente, e ta simplemente bira normalisá i transparente.
Mi no kier men transparente den e sentido ku aktonan seksual lo bira prevalente, mi kier men ku amor homoseksual lo stòp di ta huzgá.
No tabata masha ten pasá ku amor entre hende blanku i skur tabata un problema i asta misanan tabata kontra di dje. Awor akí nos no por ni pensa ku un amor asina komun por kòusa asina tantu problema. Honestamente, si bo tin un problema ku mira dos persona pintá komo un pareha, esaki ta splika mas di bo mes prehuisionan. No tin ningun manera ku gobièrnu lo pinta aktonan di vagabunderia riba ningun medio di komunikashon.

Punto sinku ta stipulá:

“Preokupashon pa ku Libertat di Ekspreshon Tweede Kamer a pasa un moshon ku ta bisa ku ‘homogenezing wordt strafbaar’ Ya kaba nan a saka yudansa sikológiko for di pakete di salubridat na Hulanda , pasobra nan a establesé kaba ku bo no por kambia bo atrakshon seksual. Pero tin miles di homo a kambia bira hetero bèk? Esnan ku a risibí yudansa no tabatin derecho di buska e yudansa ei? I den futuro kon lo ta aki na Kòrsou ora ku un persona ke buska e yudansa aki?”

E punto akí ta kompletamente robes. Tur organisashon sikiatrikó ta deskreditá “homogenizing”, i komo un persona mes ku a pasa den e proseso, mi por bisabo di eksperensia. E no ta funshoná. No solamente e organisashon sikiatrikó ta deskreditá e aktonan akí, pero ta kondená e aktonan akí komo tortura sikologikó pa un persona, sigur si e persona aki ta den etapa di desaroyo. E “terapia” nan akí ta prueba di hasi dañonan sikológiko duradero na tur personanan envolví i kontrali di misa su pensamentunan, e ta kompletamente inefektivo. Homoseksualidat i transeksualidat no ta malesanan ku por kura, nan ta aspektonan di un persona su identidat. E idea aki a kibra mas famia ku misa por pensa di konta.

Awor tokante di e miles di personanan ku a “kura” di nan homoseksualidat. Probablemente nan no tabata homoseksual mes pa kuminsá. Nan por tabata biseksualidat òf Bi-kurioso. Bi-kurioso ta ora un persona ta simplemete kurioso den e mesun sekso. E sa pasa. Mas nos bin siña tokante seksualidat, mas nos bin kompronde kon fluidó e orientashon seksual ta. Ami mes komo un persona biseksual ta sinti mi preshoná di “disidi” pa kaba kiko mi ta, sin nos por realisá ku mi no ta kuadra ku e pensamentu binario di ta òf no ta. Mi ta biseksual, mi ta haña hende muhé i hende hòmber atraktivo dor di nan aspektonan fisikó. Mi teoria, i esaki no ta preuba, ta ku e personan ku a “kura” no tabata homoseksual òf ta biseksual i nan a disidí di mara nan mes na nan insituto di preshon. Pensé bon, dikon nunka un persona nof a “kura” sin misa? Si e personan aki ta òf no ta kompletamente sinsero ku nan mes ta nan problema. Pero sensia ta duna nos un respuesta mas fasil, pero mas problemátiko ku kualke hende ku un pensamentu binario.

Hende ta kompliká, orientashon seksual ta kompliká, ekspreshon di genero ta kompliká i nos tin ku aseptá tur hende su manera di biba, komo nan ta.
Si ègt bo no por aseptá e realidat, djis aseptá ku no ta bo bida i si e situashon no ta detroriá bo bida. Djis keda afó.

Fuente:
Asosashon di Misa. (2019, july 12). LISTA di PREOKUPASHONdi PUEBLO di KÒRSOU pa ku LEI di Matrimonio entre personanan di mesun sekso. Retrieved from Vigilante Kórsou: https://www.vigilantekorsou.news/2019/07/12/lista-di-preokupashondi-pueblo-di-korsou-pa-ku-lei-di-matrimonio-entre-personanan-di-mesun-sekso/?fbclid=IwAR0b7AoOViL5mlf2a0SLlv2_pDWE44VnDhN8164XW3XXgx5WUkZUg0NCvBo
Bos, H., Knox, J., Gelderen, L. v.-v., & Gartrell, N. (2016, April). Same-sex and different-sex parent households and child health outcomes: findings from the National Survey of Children’s Health. Retrieved from HHS Public Access: https://www.ncbi.nlm.nih.gov/pmc/articles/PMC6309949/
Curaçao, L. g. (n.d.). Retrieved from https://www.facebook.com/legalizegaycuracao/?ref=br_rs
Manning , W., Fettro , M. N., & Lamidi, E. (2014, August 1). Child Well-Being in Same-Sex Parent Families: Review of Research Prepared for American Sociological Association Amicus Brief. Retrieved from HHS Public Access: https://www.ncbi.nlm.nih.gov/pmc/articles/PMC4091994/
Usakli, D. H. (n.d.). Comparison of Single and Two Parents Children in terms of Behavioral Tendencies. Retrieved from International Journal of Humanities and Social Science : https://pdfs.semanticscholar.org/b5ba/ae0cfb9399c657372253996761fb3bb68c63.pdf

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Grif – Den Bida

Bauco – Snakes (Prod. TuneParagon)