in

Kara kara ku karnaval

Ta konsiderá Karnaval komo e fiesta nashonal mas popular di Kòrsou. Aparte di esaki, Kòrsou su karnaval ta un di e espektákulonan mas grandi den e region Karibense. Hende for di diferente parti di mundu ta bini pa eksperensiá e temporada dushi aki. Den tur esaki, hopi hende no sa e orígen di Karnaval i kiko eksaktamente nos ta selebrá. Kiko karnaval ta? Dikon nos ta selebr’é? Kon otro nos vershon ta for di otro paisnan mundialmente?

Komo ku mayoria di e poblashon di Kòrsou ta identifiká komo Katóliko, no ta niun tiki straño ku Karnaval ta un fiesta popular. Esaki ta pasó e selebrashon di Karnaval ta di lenk ku e religion Katóliko i e ritualnan ku ta mará na e temporada di Kuaresma. Kuaresma ta un periodo di reflekshon di 40 dia den kual un katóliko mester yuna. Den diferente parti di mundu tin diferente manera di praktiká esaki. Por ehèmpel den kaso di Kòrsou e praktika ta pa abstené di kome karni. Aparte di esaki e ta un momentu ku un katóliko mester praktikamente purifiká su mes. Na Kòrsou bo sa tende hende bisa ku den kuaresma bo no por yega kas mas lat ku 12 or.

No ta pòrnada ku ta selebrá Karnaval semper promé ku Kuaresma, pasobra esaki ta su orígen. Tabata selebrá e Karnaval klásiko na Italia ku maskarada i disfras. En realidat, Karnaval ta e momentu ku un katóliko tin mag di “lòs laga bai”, promé ku e temporada di apstenshon drenta. Den e temporada aki ta fiestamentu den abundansia tin. Otro paisnan na Oropa a adoptá e fiesta aki for di Italia i asinaki Karnaval a bati bin Kòrsou den e temporada di kolonialismo. Na e manera ku nos ta selebr’é bo por mira e orígen i motibu dikon ta selebr’é ahinda. Den e temporada aki nos no ta hasi wega ku kuminda, alkòhòl, bailamentu i dios sa kiko mas. Despues di tur esaki, e temporada di Kuaresma ta drenta inmediatamente.

Dor ku Kòrsou ta un sosiedat multikultural, nos vershon di Karnaval a bira úniko. Den kuminsamentu ta e grupo elite so tabata selebrá Karnaval. Ta den añanan sesenta sintimentunan a lanta pa pueblo kompletu selebrá e fiesta akí. Asinaki e influensha Afrikano tambe a penetrá den nos vershon di Karnaval, kual ta bisto den por èhèmpel e importansia di tumba den e selebrashon di Karnaval. Den transkurso di tempu nos Karnaval a desorayá bira un evento masha grandi den e region Karibense. Nos Karnaval ta konsisti di: festivalnan di tumba; jump in & jump up; 4 tipo di parada ku gruponan disfrasá anto elekshon di reina di Karnaval i Prins & Pancho. Kompará ku otro pais, nos no ta hasi niun tiki wega ku e selebrashon di Karnaval!

Fuente

https://www.werelderfgoed.nl/agenda/carnaval-curacao-2019
https://nl.wikipedia.org/wiki/Carnaval_op_Cura%C3%A7ao
https://www.curacao.com/en/directory/plan/curacao-carnival/#

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 1

Upvotes: 1

Upvotes percentage: 100.000000%

Downvotes: 0

Downvotes percentage: 0.000000%

E realidat di porn

Devi Dev – Soño (prod. Benn & Paul x Beathova)