in

Kolorismo Na Kòrsou

Mi tabatin 4 aña. Un di mi promé rekuerdonan. Mi tata a baha mi na skol i mi no ke a baha for di den outo. Mi tata a puntra mi dikon mi no ke bai skol, i zundra mi ku mi tin ku hasi lihé pasó e ta yega lat. Ami a kuminsá yora i bisa ku mi no ke bai skol mas, pasó nan ta tenta mi na skol ku mi ta pretu.

For di dia mi tabata den mi promé aña di lushi, hende na Kòrsou a hasi chèrchi di mi koló di kueru. M’a yega di tende tur sorto di ‘wega’. Tentando mi dor di yama mi pretu, blou skur òf otro kos. Ora ta sukú, hende ta bisa ku mi tin ku hari si nò nan no ta mira mi. I manera bo por a rei kaba, nan a yama mi zwarte piet tambe.

Den inisio, tur e ‘weganan’ aki tabata hasi mi doló i pa hopi aña mi tabata ke ta mas kla. E benifisionan di ta mas kla, ta mas kla ku dia. Bo ta mira nan rondó di bo tur ora. Años a pasa i mi a kuminsá realisá ta dikon nos sosiedat ta asina. Mi a bin komprondé ku nos pasado kolonial i di sklabitut te ainda tin un influensia riba e manera ku nos ta pensa riba nos isla. Mi a kuminsá bira mas orguyoso di mi kueru i awòki mi a yega un punto ku mi no tin bèrgwensa mas.

Ami no ke lanta den un sosiedat kaminda mi tin ku splika mi yu ku no ta su falta ku hende ta tent’é ku e ta pretu. Mi no ke lanta den un sosiedat kaminda mi tin ku splika mi yu ku si e ta pretu, e mester ta orguyoso i no mester wòri kiko otro hende ta bis’é.

E topiko aki no ta unu ku nos ta toka hopi na Korsou. Mi ta spera ku tiki tiki nos lo kuminsa papia mas tantu di dje.

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Lil Homie – Ferfelu (prod. Cedje)

Rich – SNT (Prod Ethan Morris)