in , ,

Surviving Fuikdag

Comite Koninkrijksrelatie

Ku yudansa di social media i ku e ehèmpel di añanan anterior, Fuikdag a bira sinónimo di Gatedag. Tur hende ku no a haña maske ta un boto di piskadó pa bai riba dje ta warda tur sorto di redu, potrèt i video sali pa asina nan tambe sinti nan mes inkluí. Aña 2019 aki no a laga di desea i e di dos siman di yanüaria kuminsá ku e propagashon di un video ku a duna hende sufisiente ko’i papia pa e 78 dia nan ku a resta di yanüari.

Naturalmente, paso ta Kòrsou i redu ta kore mas lihe ku Churandy Martina den olimpiada, tur hende a wak e famoso video i sin duda tur hende a opiná. Mi no ta bai den detaye di kiko a sosodé paso no ta importante. No ta interesa mi ku e mucha tabata fuma, drogá, kansá, ku e tin 3 video kaba riba Pornhub, ku ela gusta, ku ta alter ego a take over of kualke argumento ku ke sali kuné. E artíkulo aki no tei ni pa defendé ni pa shame e persona nan den e video. E artíkulo aki ta pa habri wowo pa dos tema ku ta problemanan no solamente na Kòrsou, pero mundialmente; abuso seksual i victim blaming.

Abuso seksual

Prome ku bula spam BOHIMIO ku komentario nan manera ‘e mes tabata ke’ i ‘ken a mande hasi kos di p!#@’ i e faborito di tur hende ‘si e no tabata ke e mester a bira dal e wanta’, mi ta laga akinan e definishon di abuso seksual.

‘Abuso seksual, tambe referí komo molestashon, ta wòrdu konsiderá komportashon seksual no deseá di un persona riba un otro. Hopi biaha e ta akontesé via forsa brutu of probechá di un otro persona su situashon.’

Si e definishon no tabata sufisiente ta splike den letter chikí, ku e mucha muhé konserní a gusta of no a gusta, loke a sosodé tabata abuso seksual. No tin nada, apsolutamente nada ku ta duna bo e derechi di mishi ku un hende muhé sin permit. Hende muhé su kurpa no ta disponibel pa hende hòmber su plaser.

E kaso di Fuikdag a resaltá un problema hopi grandi na Kòrsou ora ta trata di abuso seksual i esaki ta ku NO ta rekonosé loke e ta i NO ta trate manera e kaso grave ku e ta. No solamente a share e video libremente manera ta algu prèt of ‘entertaining’, pero a sali defendé e akshon nan di e hende hòmber sin realisá e daño ku ta hasi na TUR víktima di abuso seksual. Den aña 2019 abuso seksual mester stòp di wòrdu konsideraá un tabú òfpio ainda un ‘dramatisashon di evento’.

Victim Blaming

E ‘dramatisashon di evento’ ariba menshoná ta un di e maneranan faborito uzá pa personanan ku ta kulpa e víktima den kasonan asinaki, o sea victim blaming.

Victim blaming ta e akto di devaluá un víktima di kualke krímen, aksidente òf trato abusivo dor di tene nan responsabel pa e kondukta robes ku a wòrdu kometé kontra di nan.

Pueskomentario nan resaltando kiko e hende muhé tabata tin bisté, kon e tabata baila i tur otro forma di defende e situashon ta un forma di victim blaming. Riba su mes, victim blaming ta hopi dañino pa e víktima, pero banda di esei e tin side-effects problemátiko.

Ora buta falta riba e víktima, bo ta outomátikamente kit’é for di riba e abusador, butando ku bo ta krea un sosiedat kaminda abusadornan ta sinti empoderá i no ta wak konsekuensia pa nan akshonnan. Manera ta komentá ku hende muhé ‘fasil’ ta supuestamente fis, ki dia ta haña fis di e abusador seksual?

Un segundo side effect ta ku victim blaming ta ku e ta deskurasha viktima di abuso seksual pa bini dilanti i akusá nan abusadornan. Esei tambe ta empoderá e abusador i ta krea un sosiedat ku ta permití abuso.

Pa esaki i naturalmente bo mes moralidat i empatia, próksimo biaha ku un video of un historia di e naturalesa aki yega serka bo, pensa promé ku sigui propag’ i no tene miedu di eduká esnan rondó di bo riba nan reakshon i komportashon.

Fuente:

https://definitions.uslegal.com/v/victim-blaming/

https://www.apa.org/topics/sexual-abuse/index.aspx

Leave a Reply

Your email address will not be published. Required fields are marked *

What do you think?

2 points
Upvote Downvote

Total votes: 2

Upvotes: 2

Upvotes percentage: 100.000000%

Downvotes: 0

Downvotes percentage: 0.000000%

Kuenta di siman: Konsenshi limpi

Lil Homie – Ferfelu (prod. Cedje)