in , ,

Dikon mi ta kontra di Zwarte piet

Na promé instante mi tabata pensa meskos ku kualke persona. Mi no tabata komprondé e problema ku Zwarte Piet. Pa ami Zwarte Piet tabata semper un persona prèt durante e fiesta di San Nikolas. E Pietnan tabata hasi hopi mas ku San Nikolas pa trese alegria na e muchanan. No opstante, e Pietnan tambe tabata menasá e muchanan di tal manera ku esakinan a kuminsá haña miedu.

Siendo un Yu di Kòrsou mi tabatin mesun pensamentu ku mayoria di pueblo. Ta nos tradishon, ta nos fiesta pa mucha. Si e muchanan no ta komprondé i ta gosa, pakiko stroba nan? Di un banda mi ta komprondé e sintimentu di nostalgia, di wak un mucha disfrutá di loke bo tambe tabata disfrutá di dje tempu bo tabata chikí. Sin embargo, nos ta lubidá ku e goso ta dura 3 siman – te ku 5 di desèmber pa ta eksakto – pero e problemátika ta keda. Kisas ta posibel pa desaroyá nos tradishon segun norma i balor nobo?

Despues di a studia e problemátika di diferente perspektiva, mi a konstatá dos punto klave.

Zwarte Piet ta un karikatura rasista i no tin niun manera korekto pa kambia Zwarte Piet sin kita e koló pretu kompletamente.

Na promé lugá, e personanan ku ta kontra Zwarte Piet no ke abolí e tradishon di San Nikolas. Na lugá di esei, nan ke drecha e tradishon. Laga nos kuminsá aseptá e realidat akí pa despues nos por tin un diskushon sano.

E problemátika di Zwarte Piet ta situá na su orígen i historia. Diferente fuente ta menshoná diferente orígen. Un di nan ta ku e Pietnan tabata katibunan liberá pa San Nikolas i nan a kuminsá traha pa San Nikolas komo su ayudantenan. Otro fuente ta bisa ku Zwarte Piet ta bira pretu pasobra e ta pasa dor di diferente skorsten ora e ta tresiendo regalo pa e muchanan. Ademas, algun orígen ta indiká ku Pietnan ta simplemente katibunan di San Nikolas. Pues, no tin seguridat pa loke ta trata orígen di Zwarte Piet.

No ta importá kua fuente bo ta disidí di kere, un kos ta mas ku kla: Zwarte Piet ta un karikatura ku koló di kueru pretu, kabei di krùl, lep diki i pintá i renchi di orea grandi trahá di oro. Tur e aspektonan akí ta rasista. E medionan di komunikashon di ántes a implementá esakinan pa representá un hende koló pretu na un manera chistoso i bobo. Por kompará Zwarte Piet ku e karikatura merikano Jim Crow. Loke ta sobresalí den tur dos kaso ta e kara pretu (òf, manera esnan ku ta papia ingles ta bisa: black face). Hende blanku tabata usa e karikatura di Jim Crow pa sistemátikamente oprimí e minoria di hende pretu na Merka. E ehèmpel di mas prevalente di opreshon sistemátiko ta e asina yamá Jim Crow laws, ku tabata hasi separashon rasial posibel na Merka.  

Hulanda no konosé reglanan relashoná ku Zwarte Piet, pero nos no tin mag di lubidá ku e resto- i efektonan di sklabitut ta hopi visibel den nos komunidat.

Mi ta papia na nòmber di e komunidat koló skur denter di Reino Hulandes. Nos ta praktiká kolorismo. Esaki no ta nesesariamente rasismo (rasismo ta diskriminashon a base rasa), sino un hirarkia denter di e komunidat koló skur kaminda esun ku kueru mas kla tin un posishon mas favorabel. Podisé bo a nota eksistensia di e hirarkia akí ora un miembro di famia a bisa bo: “Bo kabei krus ta mahos, bai hasié stret.” òf “Kasa ku un hende muhé/hòmber blanku, ya bo yunan ta sali mas kla.”

Ounke ta trata di prehuisio evidente, hopi hende di koló ta hasi e remarkenan akí tòg pasobra nan ta kere ku e karakterístikanan mará na hende blanku ta forma e norma.

Nos ta diskriminá nos mes, okashonando asina daño na nos outo-estima. Tin diferente kaso den kua yu di Kòrsou ta tenta mucha koló skur dor di bisa ku e tin karakterístika di Zwarte Piet. Kasonan manera esakinan ta relativamente komun na nos skolnan básiko. Es desir, asta nos muchanan no ta disfrutando mes tantu di Zwarte Piet ku sierto hende ta pretendé.

Pió ainda, roetveegpieten ta oumentá e problemátika di kolorismo. Ta asina ku roetveegpieten ta forma un solushon pa e kara pretu di Zwarte Piet i no pa henter e karikatura di Zwarte Piet. Mi sa sigur ku esnan ku ta apoyá e idea di roetveegpieten tin bon intenshon, pero nan ta lubidá ku roetveegpieten no ta kita e asosiashon negativo ku sierto hende tin ku e ayudantenan di San Nikolas. E apoyadónan ta bisa ku, den kaso di roetveegpieten, e kueru ta solamente shushi i no kompletamente pretu, pues no por asosiá nan ku karikatura rasista. Sin embargo, e idea di roetveegpieten ta konfirmá indirektamente e punto di bista ku ta enserá ku kueru pretu ta igual na kueru shushi. Hende por kuminsá asosiá e koló pretu, ku ta representá shushi i no kueru pretu, ku algu negativo ora hende rasista puntra: “Dikon bo no ta laba bo koló pretu (lesa: e kara ku ta kontené e “roetvegen”)?”  

Hopi hende di Aruba, Boneiru i Kòrsou no ta interesá den e diskushon di Zwarte Piet, pasobra e tin niun òf tiki influensia riba nan ambiente. E islanan ABC ta prodominantemente koló skur. Ounke hopi di nan ta koló skur kaba, mayoria di e habitantenan di e islanan akí ta praktiká Zwarte Piet. Den kaso di islanan ABC, e asosiashon negativo ku Zwarte Piet ta ménos prevalente pasobra e poblashon ta konsistí por lo general di hende pretu. O sea, habitantenan tin ménos chèns ku hende rasista ta aserká nan ku komentario desagradabel.   

Nos ta praktiká “whiteface” dor di pinta e kara di San Nikolas blanku, pero mi sa sigur ku niun hende blanku no tin problema ku e kustumber ei. E problemátika sentral ta ku ta asosiá tur kos ku ta positivo i bunita ku San Nikolas i ku e figura akí tin ayudantenan pretu, ku ta representá un grupo di siudadano oprimí.  Bo ta tuma bon nota di e problema ora bo forma parti e minoria ku ta sinti efekto negativo di Zwarte Piet. E mayoria no por ripar’é dje bon ei, pasobra e no mester dil ku e asosiashon negativo. Siendo miembro di e minoria afektá na Hulanda, bo ta ripará ku en realidat rasismo ta hopi prevalente ainda. Ta abo mester tende tur e lemanan rasista ku sierto habitante ku ke mantené Zwarte Piet ta ekslamá. Ta abo mester tende ku otro hende ta kompará bo, sea sarkástikamente òf chistosamente, ku aparensia di Zwarte Piet.    En kambio, mi ta komprondé reakshon di tur esnan ku ke mantené Zwarte Piet. Nos ta pidiendo un kambio drástiko. Mi ta konvensí ku bosnan no ta rasista i ku bosnan no tin niun intenshon rasista ku Zwarte Piet, pero echo ta ku nos ta eksperensiá rasismo indirekto pa motibu di Zwarte Piet.

Nos, e komunidat di hende koló skur, tin ku uni kontra karikatura rasista manera Zwarte Piet i realisá ku inkonsientemente nos ta laga un gran inhustisia, ku ta disfrasá komo tradishon, pasa kada aña. Ta un bèrgwensa internashonal pa kontinuá ku Zwarte Piet komo parti di e tradishon di Sanikolas. Komprondé ku nos tambe ta forma parti di e problemátika di Zwarte Piet (referí na e diskriminashon ku ta kousa daño na nos outo-estima). Nos mester traha un sosiedat mas inklusivo, aktivo i úniko. E úniko manera di kua nos por hasi esaki aktivamente ta dor di rekonosé i trata na kita e prehuisionan ku ta eksistí denter di nos komunidat.

Outor: Maxwell Ananías Brigitha

Un danki speshal ta bai na mi editor Marnix van Thiel.  

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 1

Upvotes: 1

Upvotes percentage: 100.000000%

Downvotes: 0

Downvotes percentage: 0.000000%

Nos tambe ke vota

Kon pretu zwarte piet ta?