in

Yuda bo mes!

Buki ku enfoke riba desaroyo personal manera “Think and Grow Rich” ta wòrdu menshoná regularmente pa empresarionan konosí ku a realisá un nivel di éksito respetabel. Desaroyo personal ta algu ku nos tur por partisipá na dje dor di tuma inisiativa i mehorá nos potensial, talento, kapasidat pa traha i konsenshi.

Desaroyo personal ta importante, paso e ta funshoná komo un medio pa transformá un deseo den akshon konkreto ku ta yuda bo yega mas serka di bo metanan. Aparte di esaki, desaroyo personal ta duna bo e oportunidat pa guia bo mes proseso di siña. Ora nos aserká desaroyo personal stratégikamente, nos por evaluá nos estado presente i identifiká e nivel ku nos ke yega den futuro.  Pensé… unda bo ta mira bo mes aki 10 aña? Sea ta den area profeshonal òf personal, bo por manifestá un deseo ku bo tin si bo traha riba dje aktivamente i ku dedikashon.

Lamentabelmente, e realidat ta ku nos a bira dependiente di institutonan di gobièrnu pa regla nos bida pa nos (de Winter, 2011). Nos ta dependé di e sistema di edukashon pa desaroyá nos konosementu i nos abilidat pa funshoná den sosiedat. Nos ta lubidá ku skol ta fasilitá nos solamente ku un diploma, i awendia ni ku un diploma bo no por garantisá empleo. Tuma nota di desaroyonan resien; kompanianan grandi manera Google, Apple i IBM no ta rekerí un diploma universitario pa wòrdu tumá den servisio. E argumento ku a wòrdu tresé dilanti pa e kompanianan aki ta ku skol no ta e úniko manera pa haña konosementu i siña un abilidat (Purtill, 2018). Aparte di esaki, e kuríkulo di skol no ta reflehá e konosementu, abilidat i aktitut nesesario pa éksito den mundu real. Pues ta importante pa nos tuma nos desaroyo den nos mes man i usa rekursonan disponibel na nos bentaha.

E revolushon digital ku nos ta eksperensiá a krea un sosiedat basá riba konosementu (knowledge based society). Konosementu ta un faktor hopi importante pa desaroyo sosial i pa desaroyo di nos sosiedat (Vali, 2013). Remarkabel ta ku konosementu ta krese den un paso eksponensial, miéntras inovashon den edukashon ta kedando atras. Nos sistema di edukashon a keda pega den e paradigma bieu, kaminda konosementu ta wòrdu pasa di un manera pasivo di maestro pa studiante. Den e paradigma nobo di edukashon e studiante tambe ta responsabel pa desaroyá su konosementu.  

Klaro ku ta responsabilidat di gobièrnu pa garantisá edukashon na nivel. Di otro banda, inovashon ta algu ku ta tuma tempu i ta kosta sèn. Mientrastantu, nos por hasi uso di e rekursonan rondó di nos pa eduká nos mes. Al final, tin diferente ruta ku bo por kana pa yega na e mesun destinashon. Bo no mester hasi un estudio pa siña kon pa desaroyá un aplikashon. Bo por siña esaki riba Youtube, pa medio di workshop, òf dor di lesa diferente buki tokante e tema.   

Pa konklui, e kuríkulo den nos sistema di edukashon no ta reflehá e konosementu, abilidat i aktitut nesesario pa éksito den mundu real. Afortunadamente, nos tin sufisiente rekurso rondó di nos. Esaki ta pone ku nos no mester ta kompletamente dependiente di skol pa siña nos loke ta nesesario pa éksito. Ku tur e rekurso nan rondó di nos, nos mes por yuda nos mes!

 

Fuente

  • Purtill, C. “Apple, IBM, and Google don’t care anymore if you went to college”. Quartz at Work. 23 Aug. 2018.
  • Vali, I. (2013). The role of education in the knowledge-based society. Procedia-Social and Behavioral Sciences76, 388-392.
  • de Winter, M. (2013). Verbeter de wereld, begin bij de opvoeding: Vanachter de voordeur naar democratie en verbinding.

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 3

Upvotes: 2

Upvotes percentage: 66.666667%

Downvotes: 1

Downvotes percentage: 33.333333%

Kon pa: Upload kantika riba Spotify?

Kempi ft. Mason – Bendishon (prod. Magicknocker)