in ,

Fasismo den Banko

Abo gusta ora hende ta manda riba bo? Bo gusta pa hende tin kòntròl riba bo akshonnan òf pensamentunan? Òf kisas abo gusta manda riba otro hende? E preguntanan aki ta mustra basta simpel anto sin mashá importansia den bida diario. Sinembargo, nan lo por ta un di e preguntanan mas importante den, no solamente un hende su bida personal, pero tambe den e institushonnan ku nos sosiedat ta basá riba dje. Si nos purba di kontestá e preguntanan aki lógikamente i honestamente, nos lo por yega na kontestanan interesante.

Un institushon polítiko ku ta maksimalisá e aspekto herárkiko aki kaminda sierto hende ta manda riba otro ta wòrdu konsiderá komo fasista, diktatorial òf totalitario[1]. Pensa riba Hitler na Alemania òf Mussolini na Italia. Esaki ta nifiká ku desishonnan ku mester wòrdu tumá pa tur e partisipantenan den e institushon ta bini stret for di ariba. Pues, oportunidat pa voto individual di kada partisipante no ta presente. Solamente esnan ku ta na kabes por tuma desishon. Den nos sistema polítiko, esaki lo ta inaseptabel. E struktura totalitario den un sistema fasista ta un di e prinsipionan fundamental di forma di organisashon sosial, ekonómiko i polítiko[5] (Figura 1).   

Figura 1. Organisashon institushonal di e gobièrnu di Alemania durante fasismo

Demokrasia a wòrdu demonstrá di ta e manera di mas hustu kaminda tur partisipante por partisipá den desishonnan ku mester wòrdu tumá, i ku no tin ningun persona ku tin poder riba e otro. Un forma swak di demokrasia ta ora tin diferensia di poder entre e partisipantenan i esnan ku nan a “elegí” (den mayoria gobièrnu moderno esaki ta e kaso, pero esaki lo wòrdu elaborá mas miho den un otro artíkulo). Nos tur ta di akuerdo ku demokrasia den polítika ta un prinsipio fundamental pa krea un sosiedat mas liber i hustu.

Pero ora ta trata di otro institushonnan importante, manera bankonan, supermerkadonan òfkompanianan di seguro, di un manera òf otro , nos ta aseptá e kontrario di lokual nos ta eksigí di nos gobièrnu. Laga nos kue un banko, un di e institushonnan di mas importante. Un banko su forma di organisashon ta basá riba prinsipionan fundamental di gobernashon korporativo (Figura 2). Gobernashon korporativo ta basá riba un struktura herárkiko kaminda partisipantenan den e korporashonnan no por vota ken ta nan lidernan[2][3].  Desishonnan interno den e korporashon no ta wòrdu tumá demokrátikamente.  Ora analisá e struktura di organisashon i e prinsipionan ku ta sali for di dje, por konkluí ku e sistema fasista ie sistema di gobernashon korporativo ta hopi similar.

Figura 2. Organisashon institushonal di e bank J.P. Morgan & Chase

E manera di organisashon sosial aki ta wòrdu apliká den kasi tur institushon importante. Sierto preguntanan opvio ta lanta despues di kompará e sistemanan aki ku otro. Dikon nos ta konsiderá esun hustu i e otro no? E institushonnan aki ta hustu mes? Pa kontestá e preguntanan aki, mester hasi un análisis riba nan funshon básiko i wak si di berdat nan por hustifiká nan outoridat i si esaki ta di akuerdo ku lokual nos ta yama libertat ku independensia. Abo ke traha den un institushon fasista? Òf bo ta preferá traha den un institushon demokrátiko kaminda bo ta determiná e direkshon di bo labor demokrátikamente huntu ku bo koleganan?

Fuente:

  1. Roger Griffin. Fascism, Totalitarianism, and Political Religion. Routledge. pp. 1–6
  2. Corporate Governance Guidelines of Goldman Sachs (Amended and Restated as of February 2018) https://www.goldmansachs.com/investor-relations/corporate-governance/board-and-governance/index.html
  3. Dutch Governance Corporate Code; ABN AMRO Group N.V. Chapter 5; One-Tier Governance structure page 65-66 (2018). https://www.abnamro.com/nl/images/Documents/010_Over_ABN_AMRO/Corporate_Governance/ABN_AMRO_Comply_or_Explain_Overview_Corporate_Governance_Code.pdf
  4. J.P. Morgan Chase & Co. Annual Report; Management Discussion and Analysis page 77-78 (2017). https://www.jpmorganchase.com/corporate/investor-relations/document/annualreport-2017.pdf
  5.  Law to Safeguard the Unity of Party and State (December 1, 1933). In United States Chief Counsel for the Prosecution of Axis Criminality, Nazi Conspiracy and Aggression, Volume III. Washington, DC: United States Government Printing Office, 1946, Document 1395-PS, pp. 978-79. (English translation accredited to Nuremberg Staff; edited by GHI staff.) http://ghdi.ghi-dc.org/sub_image.cfm?image_id=1899

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Proyekto Talento a ranka sali!

Kita bo maskarada di Halloween