in

Krisis di e bintiañero

Ayera mi tabata na un kompetensia nashonal di un organisashon ku mi ta miembro di dje. Un di e miembronan di e direktiva a aserka mi i puntra mi kon ta bayendo ku e skibimentu di mi tésis. Mi a bis’é ku honestamente mi no tin motivashon ni konsentrashon. E deadline di mi tésis ta prome di yüli, pero mi mester praktikamente fòrsa mi mes di traha riba dje. E di ku mi e ta pasando den presis meskos i ku en general e tabata eksperensiando un krísis interno. Riba internèt e a bin haña sa ku e tabata pasando den un quarter life crisis. E a kuminsá nombrá e síntomanan i ta mane e tabata bisando mi tur lokual ku mi tambe ta struggle kuné. Den e artíkulo aki mi lo trata di splika kiko un quarter life crisis ta enserá.

Tin diferente etapa kaminda hende ta eksperensiá un transishon ku diferente kambio, tantu mentalmente komo físikamente. Ta konosí ku e etapa di pubertat ta desafiante. Probablemente bo a yega di tende di mid-life crisis tambe, kaminda hendenan entre 35-50 aña ta kuminsá wòrdu enfrentá ku nan ta bai bira bieu. Nan ta kuminsá kuestioná tur aspekto di nan bida i aktua otro for di nòrmal. Sinembargo, menos atenshon ta wòrdu duná na e krísis ku e bintiañero, kual ta un hende entre 20-30 aña, por pasa aden. Esaki ta un krísis kaminda e bintiañero ta kuminsá kuestioná su futuro i su abilidat pa logra su metanan den bida.

Tabata un alivio p’ami mira ku ta algu nòrmal den e etapa di mi bida, paso honestamente mi a kuminsá duda si mi ta sufriendo un tiki di depreshon. Den mi kaso mi no a eksperensiá un krísis den mi pubertat. Mi tabata sigur di ken mi ta i kiko mi ke. Pero den e fase aki si mi tabata sinti mane mi a pèrdè noshon di mi mes, duda den kiko mi ke hasi ku mi karera i miedu ku mi no lo logra realisá mi soñonan tantu den mi bida personal komo den un karera profeshonal. Esaki ta lokual ami a pasa aden, pero mi lo nombrá e símtomanan ku en general ta wòrdu menshoná.

  1.     Duda den e eskoho ku bo a hasi pa loke ta trata bo estudio òf bo trabou

E estudio ku bo a skohe realmente ta pas ku ken bo ta? Bo ta mira bo mes hasi e trabou aki pa restu di bo bida? Skohe bo a skohe òf sirkunstansia di bida a buta ku bo ta hasiendo algu ku no ta pas kubo mes?

  1.     Sinti bo isolá for di bo ser kerínan

Maske ku bo tin bo ser kerínan i amigunan bo ta sinti bo bo so. Ta mustra mane bo no por komuniká kiko bo ta sintiendo anto bo no ke kansa nan tampoko. Enbes di papia tokante di bo problema bo ta keda ketu i dil ku nan bo mes.

  1.     Duda si bo lo bira eksitoso den bo bida (naturalmente lokual esaki ta nifiká pa abo)

Esaki ta un hansha ku bo no lo realisá e soñonan ku bo tin i e ta trese un duda den bo mes. Bo por pèrdè noshon di kiko bo ke logra tambe i esaki ta mayoria bia ta okashoná un falta di motivashon.

  1.     Kompará bo mes ku otro hende

Riba bo Instagram feed, bo ta mira bidanan fabuloso ku ta leu for di lokual bo ta eksperenshando? Bo ta mira hende ku tin sixpack, kome salú, biaha rònt mundu, forma nan famia, mientrastantu abo ta bashi ta lombra wowo i Netflix and chill bo so den bo studio chikí ku un BBQ grill ku bo a kaba di bestèl for di thuisbezorgd.nl.

  1.     Tur kos ta bayendo bon ku bo bida, pero bo ta sinti bo infelis

Bo tin famia ku stima bo, un grupo di amistat ku ta stimulá bo pero tòg bo ta sinti bo pèrdí.

No ta kla kiko futuro lo tin pa bo i kon bo lo sigui desaroyá.

Si bo tambe ta pasando aden, ta bon pa sa ku bo no ta bo so i ku aparentemtente ta un fase normal ku un bintiañero por pasa aden. Pa kada hende e ta diferente tambe. Porta un otro hende a pasa den mas difikultat den su pubertat i awoki no por identifiká ku lokual a wòrdu menshoná. Hopi hende no ta papia tokante di nan strugglenan, paso e ta wòrdu relashoná ku bèrgwensa i debilidat, i mustra bo vulnerabilidat sigur no ta fasil. Pero ta importante pa sa ku papia ta yuda relativá bo pensamentunan i al final e ta un fase ku bo no por keda pegá den dje tampoko. Lokual ami sa ta ku al final nos por logra lokual nos ke den bida i si nos no ta satisfecho ku kaminda nos ta awe, nos lo tin ku tuma e desishonnan i akshonnan ku ta buta nos bida den e direkshon ku nos ke. Djis sa ku ta normal i humano pa nos tin un dipje.  

Fuente:

https://www.nsmbl.nl/6-tekenen-dat-je-een-quarterlife-crisis-hebt-en-tips-om-er-vanaf-te-komen/

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 1

Upvotes: 1

Upvotes percentage: 100.000000%

Downvotes: 0

Downvotes percentage: 0.000000%

E Arte Di Rèp: NokBlok

Pensa mane un abogado, no hasi mane un