in ,

Bot’un Katibu? Kasi sigur!

Kiko kièr men ta un katibu? Mayoria bia ora nos papia tokante di sklabitut, nos ta pensa mesora riba Tula ku Badjan Karpata ku a hunga un ròl hopi grandi den nos liberashon for di e sistema di sklabitut. Esaki tabata un forma hopi kruel di sklabitut, pero e no ta e úniko forma di sklabitut. Den e temporada ku nos a liberá nos mes for di sklabitut, Estadonan Uní a kaba di sali for di un guera sivil. Esaki tambe tabata kontra di sklabitut ku nos rumannan Afrikano mester a biba bou di dje. Banda di e importansia di e lucha aki, tabatin un otro lucha ku no ta hopi famoso. E lucha aki tabata kontra di e sistema ekonómiko ku e kapitalistanan kier a imponé riba e populashon. Pero kon nos sistema ekonómiko di awor por tin algu di aber ku sklabitut?

 

Pero kon nos sistema ekonómiko di awor por tin algu di aber ku sklabitut?

 

Durante di e tempu ku awor nos ta yama The Enlightenment (1685-1815), kaminda e fundeshi filosófiko di siensia a desaroyá, filosofia polítiko tambe a desaroyá dor di personahenan manera Wilhelm van Humbolt, Adam Smith ku Jean-Jacques Rousseau. Durante di e periodo aki, hende a bin komprondé ku libertat i kreatividat ta aspektonan esensial den un ser humano su bida. For di esaki a sali un sistema polítiko i ekonómiko basá riba e prinsipionan fundamental aki. Esaki ta enserá ku e populashon semper mester ta den oposishon di konsentrashon di poder i rikesa, pasobra esaki semper lo limitá e libertat di un gran parti di e populashon. P’esei nan a purba di limitá e poder ku e estado – kual tabata dominá dor di religion kristian – tabatin riba hende su pensamentu i aktonan. Den e kuminsamentu di e revolushon industrial, un gran parti di e populashon – esaki tabata un fenómeno rònt mundu – tabata kontra di esaki, pero dikon? Pasobra nan tabata konsiderá esaki komo un otro forma di sklabitut.

Kompanian (korporashonnan) a wòrdu kreá riba e filosofia ku un ser humano no tin derechinan inherente. Úniko derechinan ku bo tin ta e esnan ku bo por haña riba merkado di labor. Esei ta enserá ku si bo no ta traha, bo no tin derechi di biba. P’esei a introdusí un sistema basá riba labor remunerado kaminda bo no ta traha pabo mes, pero pa un otro ku tin kòntròl riba bo bida. Bo no tin derechi di elegí e personanan ku ta manda riba bo i bo no ta kontrolá bo mes trabou. Banda di esei, poder riba e kapital ekonómiko tampoko bo tin, paso esei lo keda den man di e doño i otro hendenan ku a kumpra parti di e kompania. Esaki no ta masha diferente for di sklabitut. Úniko diferensia ta ku ora bo ta un katibu, bo tin un doño, i ora bo ta traha pa un salario, nan ta hür bo.

Awor e pregunta ta, kon otro nos por organisá nos mes pa kibra e sírkulo visioso ku nos ta aden aworaki, kaminda 8 ora di dia bo ta un esklabo pa un hende ku no konosé bo i no ta wòri ku bo? Tin diferente manera pa hasi esaki, pero mester tene na kuenta ku mester ta kouteloso promé ku tuma akshon. Mester informá, eduká i plania den un forma demokrátiko pa wak kon nos por sigui ku e lucha laboral. Esaki por wòrdu lográ dor di hasi uso di e sindikatonan ku nos tin kaba. Òf por lanta otro forma di organisashon pa transformá nos sosiedat kulturalmente i mentalmente. Ta keda na abo i sobrá di pueblo pa hasi algu tokante esaki. Bo ta un katibu?

 

Fuente:

–    W.v. Humbolt; “The Limits of State Action. Chapter 2; Of the Individual Man, and the Highest Ends of His Existance” 1792.

–    R. Rocker; “Anarcho-Syndicalism: Theory and Practice. Chapter 3; The Forerunners of Syndicalism”. 1938

–    E. Weber; “Movements, Current and Trends: Aspects of European Thought in the 18th and 19th century”. 1992

–    T. Dublin; “Women, Work and Protest in the Early Lowell Mills: The Oppressing hand of Avarice Would Enslave Us”. 1975

–    M. Georgen; “International Corporate Governance; Chapter 3”. January 2012

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Papia ku palabra

Nos ke bini bek?