in , ,

Kuantu sèn nos naturalesa ta bal?

Ta konosí ku na Kòrsou en general nos no ta presta hopi atenshon na nos naturalesa. Nos ta asumí ku semper e tabata t’ei, i ku semper e lo keda. Tin un grupo chikí ku si ta konserní ku e estado di e naturalesa i medio ambiente na Kòrsou. Hopi bia nan no ta wòrdu tumá na serio òf hende ta ignorá nan, pasó tin kosnan mas “importante” pa wòri kuné. Un di e argumentonan ta ehèmpel: “tin sèn pa traha, tin otro kos di hasi”. E delaster dékadanan aki sientífikonan i ekonomistanan a hasi hopi estudio riba e balor ku medio ambiente i/òf naturalesa tin. Mayoria bia ta difísil pa kalkulá i ekspresá e balor akí den sèn. Sinembargo, esey no a stòp nan pa sigui purba.

Awendia tin bastante manera pa kalkulá e balor monetario di por ehèmpel un parke di naturalesa, ref di koral òf e daño ku polushon por hasi riba hende. Un di e maneranan aki ta pa kuantifiká servisionan di ekosistema. Mi por tende e pregunta kaba: ”Kiko ta servisionan di ekosistema?”

Servisionan di ekosistema ta e benifisionan ku e ser humano ta haña pòrnada for di un medio ambiente i/òf ekosistema ku ta funshonando. E ekosistemanan aki ta inkluí refnan, laman, mondi, saliñanan i hopi mas. E benifisionan aki ta inkluí awa pa bebe, fertilidat di kunukunan, deskomposishon di por ehèmpel kadaver di bestia morto, òf asta kosnan rekreativo, manera un dia na laman ku bo famia.

Ami no sa di estudionan na Kòrsou of Aruba ku a ser hasí riba e balor di nos naturalesa of medio ambiente. Pero si mi sa di un estudio den 2013 ku a konkluí ku e balor ekonómiko di servisionan di ekosistema di Boneiru, Saba i Sint Eustasio tabata 31%, 63% i 24% di nan BBP respektivamente. (http://edepot.wur.nl/426340)

Ban tira un bista riba un situashon na Kòrsou.

Refineria Isla ta kontribuí ku 10% di nos BBP, esaki ta sin kita e balor di e daño ku e ta hasi na medio ambiente i salú di hende. Ta bon pa sa, ku segun un rapòrt di Ecorys-NEI e polushon di BOO i Isla ta kousa mas o menos 18 morto prematuro pa aña. Ademas, e ta kousa bastante kaso di hende ku ta sufri di malesanan króniko. Banda di esei, e ta kontaminá e medio ambiente ku ta den bisendario. Pero nos no sa sufisiente kon grave e situashon akí ta.

Kuantu un tereno di mas o menos 400 hèktar lo kontribuí si nos restour’é i remplasá e refineria bieu ku industrianan mas limpi i moderno rondoná ku un medio ambiente mas limpi?

Asta si esaki no a konvensebu ku nos mester trata nos medio ambiente i naturalesa mas miho djis kòrda:

Kana na laman ku bo famia, no tin preis.

Sambuya i wak koral, no tin preis.

Subi seru St. Kristòfel i wak yuana? No tin preis.

Pero awendia ku siensia, nos por yega hopi serka na kalkulá e balor ku nan tin.

Tin mas ehèmpel di servisionan di ekosistema na Kòrsou ku nos por kuidá mas mihó, i saka nan potensia máksimo?

Leave a Reply

Your email address will not be published. Required fields are marked *

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Bo sa ku robòt ta bai kita bo trabou foi bo tòg? #djispabosa

Ta papa Dios so ta komprondé mi!?