in ,

Religion ta homofóbiko?

A yega ora pa nos kuminsá papia di e homofobia ku ta eksistí na Kòrsou. E ta un tabú ku t’ei pa basta aña kaba i e ta birando mas relevante den nos komunidat. Dor di nos “kultura” ku tin un influensia basta grandi di religion, hopi hende na Kòrsou no ta masha di akuerdo ku homoseksualidat. Si nan ta di akuerdo mes, nan ta preferá e ta riba un distansia. Por ehèmpel si bo puntranan si nan ta homófobiko nan lo bisa “nò, paso mi tin yen amiga lèsbiana plùs 2 amigu “m*riku”.” Pero ta e mesun personanan aki lo no aseptá si nan yu, of un ser kerí mas serka ta homoseksual.

Bibando den un sosiedat kaminda mi mes ta un minoridat aki na Hulanda, ta difísil pa ignorá e problemanan ku otro gruponan marginalisá ta wòrdu enfrentá kune kada bes. Ami ta un persona ku lo para semper pa igualdat sosial. Mi mes ta siñando hopi, i mi ta kometé fayo tambe ainda. Pero mi no por keda ketu mas i wak nos destruí otro sernan humano. Ademas, mi ta habrí pa tende di otro kon ami por ta un ser humano mas mihó ku ta asepta otro minoridatnan sin problema. Ban papia di algun argumento i komentario ku hende na Kòrsou sa usa i duna ku ta robes riba un nivel fundamental.

“Nos religion no ta di akuerdo ku e manera di biba ei.”

Anto kiko? Tin sufisiente kos ku religion no ta di akuerdo kuné. Tene nan den misa, i separa e moralnan ei for di sosiedat. Bo sa kiko mas religion no ta di akuerdo kuné? Bisti renchi orea, kadena òf otro prenda. Den 1 Timoteo 2:9 tin skibí: Meskos, mi kier pa hende muhé dòrna nan mes ku bistí apropiá, desente i moderá, no ku kabei tur na flègt i oro òf pèrla òf bistí kostoso.

“Beibel ta bisa ku…”

Beibel ta bisa hopi kos i tur ta habrí pa interpretashon. Ata un versíkulo mas akí ku “beibel ta bisa” ku mi tin sigur bo lo haña motibu pa interpreté na bo benefisio. Bo tabata sa ku beibel ta aprobá sklabitut?

1 Pedro 2 versíkulo 18 ta bisa: Sirbidónan, sea sumiso na boso shonnan ku tur rèspèt, no solamente na esnan ku ta bon i suave, ma tambe na esnan ku ta trabahoso.

“Homoseksualidat ta un piká.”

Kondená personanan ku ta homoseksual i bisa ku e ta un piká ta indirektamente bisa ku e personanan no ta bal e amor di Dios. Ademas, esaki por tin efektonan grave riba e personanan ku enberdat ta homoseksual. Nan ta bira insigur, i ta sinti ku nan no ta ser aseptá dor di komunidat. Ademas, dikon menshona esaki komo piká i no tur e otro kosnan ku ta pasa ku bo mes?

“Hesus por salbabu…”

Bisando un persona ku ta homoseksual ku Hesus por salb’é atrobe ta indika ku e persona ta bibando un bida inkorekto. Tin hopi persona ta pasa añanan “den kashi” ta resa pa kambio. Nan no ke kambio paso nan ta sinti tin algu robes ku nan. Nan ke kambio paso nan ke wòrdu aseptá den un komunidat. Pasó enbes di e komunidat kambia i adaptá su norma i balornan, e komunidat ta keda diskriminá i den mesun rosea bisa “ami no tin nada kontra homoseksual, pero….”. Un persona no ta skohe pa ta homoseksual!

Papa Francisco resientemente a bisa un hende hòmber den un entrevista ku CNN: “Dios a trahabu asina akí. Dios stimabu asina akí. Papa mes tambe stimabu asinaki i abo mester stima bo mes i no prekupá ku loke otro hende tin di bisa.”

“Dios a trahabu asina akí. Dios stimabu asina akí. Papa mes tambe stimabu asinaki i abo mester stima bo mes i no prekupá ku loke otro hende tin di bisa.”

P’esey e teksto aki no ta pa ataká niun grupo religioso. Lo ke si mi ke hasi ku e artíkulo ta ataká kada un persona ku ta skonde nan homofobia tras di nan religion i/òf kultura  . Religion no mester ta e motibu ku bo ta kontra homoseksual. Kultura no ta e motibu dikon bo ta kontra homoseksual. Abo ta e motibu ku bo ta kontra homoseksual.

Leave a Reply

Your email address will not be published. Required fields are marked *

What do you think?

1 point
Upvote Downvote

Total votes: 3

Upvotes: 2

Upvotes percentage: 66.666667%

Downvotes: 1

Downvotes percentage: 33.333333%

BOHIMIO Ta Presentá: Den Studio ku Juny Martina

Machismo por ta “tóksiko”?