in ,

Sota ku her’i strika

Riba 4 di mei 2018, Vigilante a raportá riba un situashon kaminda un mama aparentemente a dal su yu ku heru di strika den kabes, poniendo ku ambulans mester a bin piki’é. Si bo lesa e komentarionan ‘bou di e post di Vigilante riba Facebook, ta un meks di hende rabiá yamando e kos ekstremo, hende ku ta haña e kos prèt, i hendenan ku ta puntra “ta kiko e yu a hasi anto”. Uniko kos ku ta ècht hasi e situashon aki “ekstremo” ta ku e yu mester a bai hospital, tòg?

No ta straño ku tin hende ku ta pensa e asuntu aki ta prèt, òf ku nan ta haña ku e mucha lo mester a meresé lokual ku e a haña. Dalmentu di mucha komo kastigu ta algu basta komun, i sigur ta algu hopi normal den nos kultura. Sin embargo, diferente estudionan, inkluiendo mas ku 160.000 mucha di 13 pais i durando 50 aña, ta konkluí ku duna sota tin konsekuensianan negativo riba nan desaroyo. Sè, dalment’i mucha ta algu malu i pues no mester wòrdu hasí.

“Pero warda”, bo lo por ta bisando, “ami a kome yen sla i mi ta bon bon.”

“No ta abusu, ta disiplina.”

“E ta traha!”

E argumentonan eiriba ta un par di esnan di mas komun, pero a resultá ku nan no ta masha válido. Kiko e efektonan di duna sota ta anto?

Poder ta manda

Na promé luga, un di e problemanan di mas grandi ta e mensahe ku bo ta duna bo yu. Bo ta mustr’é ku violensia ta un opshon pa logra un meta. E yu no ta komprondé nesesariamente dikon su akshonnan ta malu, pero djis ku e no tin ku hasi’é pa e no haña sla. Òf e ta siña kon pa gaña ya e’n tin ku kome sla. Poder i outoridat ta lokual ta prinsipal, en bes di pensamentu lógiko, komprenshon i empatia.

Dalmentu por afektá desaroyo sosial

Muchanan ku ta wòrdu di dal tin mas chèns di desaroyá agreshon i komportashonnan asosial. E chèns ta mas grandi ku nan lo tin problemanan mental, manera anxiety i self-esteem abou, i e tin impakto negativo riba e relashon entre mayor i yu. En bes di asosiá e mayor ku amor, nan por asosiá e mayor ku strès, peliger i doló. Muchanan por keda sin kompartí nan pensamentu i eskperensianan, paso nan tin miedu di haña sla. Banda di esei, mayornan ku ta dal nan yu tin mas chèns di abusá nan yu físikamente, manera esun menshoná ariba. Bo ta korda e dicho “dalmentu ta stimashon”? Kon por ta ku muchanan ta wòrdu siñá pa asosiá violensia ku amor? Al final, e mucha ta krese bira un adulto ku tambe lo bati su yunan i kere esaki ta bon. E e siklo di violensia ta sigui.

Pero ta kiko sí por hasi e or’ei?

Tin diferente manera pa straf un mucha na un manera positivo pa e por siña komportá su mes, sin mester usa violensia. Un di nan ta pa duna un mucha un time out. Djis pone e mucha sinta un kaminda ketu pa un tempu kaminda e por siña kalma su mes i e no por buska bo atenshon.

Laga e mucha komprondé kiko e konsekuensia lógiko di su akshonnan ta. Por ehèmpel, dor ku e a hasi bochincha delaster bia, e no por bai supermarket kubo. Si e komportá su mes, e por bai. Dun’é e opshon pa kis.

Bo yu mester sa kiko bo ta ferwagt di dje. Sòru pa e sa kon e tin ku komportá su mes anto dikon. Siña nan kon nan por kambia nan komportashon.

Kita un privilegio pa un periodo. Lag’é komprondé ku su akshonnan por pon’é pèrdè sierto privilegionan, manera wak televishon of hunga wega. Si e komportá su mes, e por haña su privilegionan bèk.

Korda remarká ora bo yu ta hasiendo algu bon. Dune atenshon positivo i lag’é sa ku bo ta kontentu ku e manera ku e ta komportá. E tin ku komprondé dikon su akshonnan ta bon. E por asta haña un rekompensa si e komportá su mes bon. I asina tin hopi mas manera pa por sòru ku un mucha por siña komportá su mes, sin mester di usa violensia.

Al final, nos ke pa muchanan no solamente komportá nan mes, pero pa nan komprondé kiko e konsekuensia di nan akshonnan ta. Nan tin ku komprondé dikon sierto akshon ta akseptabel i dikon otro nò. E métodonan aki por ta difísil i ta nesesitá pasenshi, pero nos yunan ta meresé e esfuerso. Porta abo wòrdu di dal i a sali bon, pero esei no ta nifiká ku no tin otro ku ta sufri efekto di dalmentu. Kisas bo mes ta sufri di e efektonan sin bo sa. Banda di esei, si bo a sali bon mes, bo por a sali bon sin haña sla tambe. Pa kiko laga un mucha pasa dor di tur e strès i doló ei?

Kiko bo eksperensia ku sotamentu ta? E artíkulo aki a kambia kon bo ta pensa tokante sotamentu?Si bo tin yu, ki otro métodonan bo sa usa pa bo yu komportá su mes ku no ta duna sota? Laga nos sa kiko bo ta pensa!

This post was created with our nice and easy submission form. Create your post!

What do you think?

0 points
Upvote Downvote

Total votes: 0

Upvotes: 0

Upvotes percentage: 0.000000%

Downvotes: 0

Downvotes percentage: 0.000000%

Retonan pa desaroyo sostenibel di Kòrsou

Fin di lionfish?